8 balay naugdaw

CEBU, Philippines - Walo ka panimalay ang nangaugdaw sa duha ka managlahing insidente sa sunog sa dakbayan sa Sugbu kagahapon sa hapon nga midanyos og kapin sa P.8 milyon.

Unom ka balay ang hingpit nga nangaugdaw sa sitio Maracas sa barangay Lahug nga nagsugod sa panimalay sa managsuong Reynaldo ug Ernesto Romarate.

Lakip sa nasunogan mao sila si Sally Cabillan, Tudia Romarate, Elena Codera, ug managsuong Marilou Gonzales ug Bonifacio Gonzales. Usa ka Jason Gonzales usab ang naangol human masamad sa iyang walang lapalapa.

Si SFO1 Nilo Daculan sa pakighinabi sa Banat News kagahapon nagkanayon nga nadawat nila ang alarma alas-3:10 ug gibutang sa second alarm ug mapasalamaton kining daplin ra sa dalan ang fire scene tungod kay dali nila kining nakontrolar sulod lang sa onse ka minutos.

Matud pang Daculan nga si Reynaldo Romarate diha magpuyo sa ikaduhang andana samtang si Ernesto diha sa silong, giingong diha magsugod ang kalayo sa giokupar nga andana ni Reynaldo.

Base sa alegasyon sa asawa ni Ernesto nga si Rebecca nga diha ra sa silong diha magsugod ang sunog sa ikaduhang andana.

Padayon pang gisusi sa kabomberuhan ang hinungdan sa sunog apan base sa pangangkon ni Rebecca adunay silingan nilang nakabantay nga may mikilab diha sa poste sa kuryente dili layo sa ilang balay.

Gisusi karon ni Daculan ang kamatuoran niini sanglit giingong naputlan naman sa kuryente ang maong balay.

Gibana-banang moabot sa P410 mil ang danyos sa mga kabtangan nga nangaugdaw.

Samtang nianang alas-2 sa hapon kagahapon laing sunog usab ang miulbo diha sa dalan Katipunan sa barangay Labangon human usa ka panimalay nga gipanag-iya ni Nestor Aveztrus ang gilamoy sa kalayo.

Matud pang Daculan gibana-banang mokabat sa P400 mil ang danyos sa maong panimalay nga adunay bodega nga ginama sa mixed materials. Matud pa niini diha magsugod sa usa sa mga lawak sa mga katabang ang kalayo.

Ipatawag ugmang adlawa alang sa imbestigasyon ang katabang sa mga Avezturs nga giilang si “Nelia” kinsa diha nangutaw og sinina sa gawas sa lawak nga diin magsugod ang kalayo. (BANAT)