Talisay motukod og reclamation project

CEBU, Philippines - Si Mayor Socrates Fernandez sa dakbayan sa Talisay milagda og kontrata niadtong Biyernes sa buntag tali sa usa ka pribadong developer diha sa iyang buhatan sa city hall alang sa pag -reclaim sa 100 ka ektaryang municipal water sa siyudad aron himuong industrial o commercial site sa umaabot.

Ang kagamhanan sa siyudad pinaagi ni Fernandez ug chairman sa Jute Development Inc. nga si Willy Te nagkanayon nga sa maong proyekto gipaabot nga mopauswag sa kalamboan dili lang sa siyudad lakip na ngadto sa tibuok rehiyon.

Ang paglagda gitambongan usab ni 1st District Kong. Eduardo Gullas.

 “Where as, industrial and economic growth not only in the City of Talisay but the region as well, will inevitably result from the development of submerge land, reclamation of foreshore land, and other areas deem needed in relation to the development of the City of Talisay,” sumala pa sa tipik sa memorandum of agreement.

Gikasabutan nga ang Jute Development, Inc. maoy mo-develop o mo-reclaim sa parte sa dagat base sa giaprobahan nga plano sa Community Environment and Natural Resources of the Land Management Bureau ug dili mogasto ang siyudad.

Ang nahisgutang 100 ka ektaryang luna ug municipal water anamon pag-ugmad. Unang ugmaron ang 50 ektarya nga giila na sa city assessor isip “free areas.”

Si Gullas nga nahinabi sa mga tigbalita nagkanayon nga ang ubang parte sa 100 ektarya tipik sa lugar nga gitukoran karon sa fish port diha sa barangay Tanke ug sa silingang barangay niini.

Matud ni Gullas nga ang nahisgutang lugar mamahimo na unyang economic zone nga usa ka income-generating district sa siyudad ug gituohan sa kongresista nga makatabang sa mga Talisaynon aron makakita og trabaho. (BANAT)