CEBU, Philippines - Nanawagan si Cebu City Mayor Michael Rama sa business sector nga ipatigbabaw ang ilang konsensya kalabot sa usbaw sa suhulan sa ilang mga mamumuo ug dili na unta magpaabot pang pangunayan sa mga trabahante ang pagpangayo og dugang usbaw sa suhulan.
Hinuon giklaro ni Rama nga mas maayo nalang nga adunay P18 nga usbaw sa minimum wage base sa gipakanaug nga desisyon sa Regional Tripartite Wages and Productivity Board alang sa mga kawani dinhi sa Central Visayas kaysa wala.
Giklaro ni Rama nga angayan unta nga tan-awon sa mga negosyante ang tukmang mga suhulan ug mga benipisyo base sa kabug-aton sa trabaho aron dili mosangpot sa pag-welga sa mga kawani.
Samtang gidepensahan sa presidente sa Cebu Chamber of Commerce and Industry (CCCI) Samuel Tionzon ang P18 wage increase sa mga trabahante dinhi sa Central Visayas.
Matud pa niini wala silay supak sa P18 tungod kay mao kini ang ilang gituhuan nga makaya sa mga magpapatigayon nga mahatag ngadto sa mga trabahante.
Gihulagway ni Tionzon ang maong wage increase nga ‘win-win solution’ aron mahatag usab ang gipangayo sa mga mamumuo ug dili usab malugi ang ilang negosyo.
Si Tionzon nagkanayon nga dili usab angayan nga pasubrahan ang kataas sa usbaw kay tingali og daghan na unyang mga kompanya ang manira ug daghan hinuon ang mawad-an og trabaho.
Dugang pa niini nga angayan usab nga respetohan sa mga labor sector ang desisyon sa RTWPB.
Samtang ang labor sector wala matagbaw sa maong usbaw. Matud pa ni Associated Labor Union kon ALU spokesperson Joy Lim nga dili makiangayon ang gihatag sa RTWPB kay gamay ra kaayo kini itandi sa laing mga lugar partikular na sa Mindanao Area nga mas dako pa kay sa Central Visayas.Sigon pa ni Lim nga ang standard of living sa Cebu ikaduha lamang sa Manila busa mas dako unta ang usbaw sa suhulan sa Central Visayas kun itandi sa Mindanao area.
Tungod niini, si Lim miingon nga posibleng modagsa unya ang mga rally ug protesta sa mga mamumuo kalabot sa gigamyon sa usbaw sa suhulan karong umaabot nga mga adlaw. (BANAT)