Kaso sa 'Shabu-11' dad-on sa Senado

CEBU, Philippines - Kalangay sa kaso sa gibansagang ‘Shabu-11’ kabahin sa nadiskubrehang giingong mega shabu laboratory sa Mandaue City diha sa RTC branch 28 ipaabot ni Senador Vicente “Tito” Sotto III ngadto sa Senado.

Si Sotto mitambong sa hearing sa maong kaso sa 11 ka akusado sa milabay’ng adlaw diha sa sala ni Mandaue City RTC Branch 28 Hon. Judge Marilyn Yap.

Base sa obserbasyon ni Sotto, kini nadismaya apan miangkong wala na matingala sa pagkaoktaba sa pagdungog sa maong kaso.

Niadtong Abril ning tuiga mitambong usab gihapon si Sotto sa susamang hearing sa ‘Shabu-11’ apan gi-postpone gihapon kini subay sa hangyo sa depensa.

Matud pa ni Sotto nga aduna siya’y lig-ong basehanan aron mopanday og balaudnon nga magbutang og mga “special courts” alang sa pagdungog sa tanang mga kaso nga naglambigit sa illegal nga drugas sa matag siyudad ug munisipalidad sa nasud.

Sumala pa niini nga iyang ipaabot ngadto sa Senado ang iyang mga naobserbahan sa pagdungog sa kaso sa 11 ka akusado nga iyaha karong gibansagang “the longest dragging case in the Philippines.”

Ang maong kaso niadto pang bulan sa Septiyembre tuig 2004 gisugdan og hearing apan hangtod karon wala pay napagawas nga hukom ang hukmanan.

Wala mahinayon ang hearing sa milabay’ng Biyernes human ang depensa napakyas sa pagsumiter sa ilang “formal offer of documentary evidence” ngadto sa korte sa gikatakdang panahon.

Base sa abogado sa akusado nga si Calvin Tan ang maong dokumento nabilin sa lamesa sa ilang secretary hinungdan nga kini nalangay sa pagsumiter ngadto sa korte.

Gumikan niini si Judge Yap mihatag og higayon ngadto sa mga State Prosecutors nga sila si Fiscal Archimedes Manabat ug Fiscal Juan Pedro Navera sa pagsumiter sa ilang komento sa formal offer sa depensa.

Ang mega shabu laboratory gironda sa mga sakop sa Philippine Drug Enforcement Agency diha sa barangay Umapad dakbayan sa Mandaue ug miresulta sa pagkasikop sa 11 ka mga Chinese nationals.

Lakip na niini ang giakusahang maoy financer nga si Calvin Tan nga gibuwag og bilanggoan ug naa karon sa Cebu Provincial Detention and Rehabilitation Center samtang ang iyang mga kaubanan diha gibilanggo sa Mandaue City Jail.

Lakip sa mitambong sa maong hearing mao si kanhi Kong. Antonio Cuenco nga usa sa mga misuwat sa Akta Republika 9165, ug kanhi Dangerous Drugs Board under secretary Paul Clarence Oaminal nga pulos usab nasagmuyo sa kalangay sa dagan sa maong kaso. (BANAT)