CEBU, Philippines - Hingpit nang gitunol sa kagamhanan sa lalawigan sa Sugbu ang laing hinabang ngadto sa mga nabiktima sa sunog sa barangay T. Padilla sa siyudad sa Sugbu niadtong milabay’ng adlaw gawas pa sa una nang gisaad nga P5 milyones sa Kapitolyo.
Si Gob. Gwendolyn Garcia maoy nangulo sa pagpang-apod-apod og mga sinina, habol, pagkaon, tubig, bugas ug uban pang mga gamit sa balay ngadto sa 1,500 ka mga biktima sa sunog sa may barangay T Padilla.
Kauban sa gobernador sa pagpanghatag og hinabang mao ang pipila ka mga sakop sa Hunta Probinsiyal, Provincial Social Welfare Office inabagan sa pangulo sa Superbody Beautification Commission nga si Mariquita Salimbangon Yeung ug ang barangay officials.
Gawas sa maong hinabang si Garcia nanghatag usab og mga school supplies sa mga estudyanteng mga kabataan nga nabiktima usab sa sunog.
Si Garcia nagkanayon nga natandog siya sa nanggawas nga balita nga ang mga kapin sa libo ka mga pamilyang naapektohan sa sunog nanginahanglan og "Good Samaritans" tungod sa kadako sa panginahanglanon sa mga biktima.
Matud pa sa gobernadora nga ang gipanghatag niya sa mga biktima sa sunog gikan sa mga stocks sa Kapitolyo nga gitagana alang sa kalungsuran.
Dugang pa sa gobernadora nga nalipay siya pag-ayo tungod sa mainitong paghangop sa mga tawo sa T. Padilla sa iyang paghatag sa maong mga hinabang. (BANATNEWS)