Gi-sex slave sa papa

CEBU, Philippines - Duha ka menor de edad ang naluwas gikan sa mga kamot sa ilang amahan nga mihimo kanilang ‘sex slaves’ sulod sa walo ka tuig ug sulod niining mga bulana nakatilaw usab sila og kulata.

Ang amahan nga nagpangidaron og 50-anyos ug usa ka karpentero uban sa mga biktima molupyo sa usa ka barangay sa lungsod sa Tuburan.

Si Criminal Investigation and Detection Group (CIDG), deputy chief Ritchie Posadas nagkanayon nga dihang nagpangidaron pa og 9-anyos ug 8-anyos ang duruha nagsugod ang pagpahimulos sa amahan sa iyang mga anak ug gibaharang pamatyon apil na ang ilang inahan kun sila mosumbong.

Tungod sa pagpanghadlok nagpakahilom nalang ang mga bata ug sulod sa walo ka tuig iyahang gihimong pahuwasanan ang 9-anyos nga anak ug lima usab ka tuig ang pagpahimulos niya sa 8-anyos nga manghod niini. Apan karong nag-edad na og 17-anyos ang maguwang nga dalagita nakadesider kining isumbong ang gihimo sa ilang amahan kanila pinaagi sa pagsuwat ngadto sa inahan niadtong Agosto 9.

Diha sa maong suwat gisaysay sa 17-anyos ang paglugos kanila sa suspek, apan ang inahan sumala pa dili makamaong mobasa maong iyaha kining gipabasa sa iyang igsuon ug mao nalay ilang kakugang sa unod niini.

Sumala pa sa inahan nga wala siya magdahom kini tungod kay iyang pagtuo tinarong ang gibuhat sa iyang kanhi kapuyo kini tungod kay gipatungha niini ang ilang mga anak.

“Wala nako makaagwanta sa iyang gibuhat,” naghilak nga gipasabot sa 17-anyos. “Dili na, dili na maayo iyang gibuhat namo, kinahanglan na siya mapriso,” naghilak usab nga gibutyag sa 12-anyos nga biktima.

Ang suspetsado sa iyang bahin hugtanong mihimakak sa pasangil ug misumbalik og pasangil nga ang milugos sa mga biktima mao ang kanhi kapuyo sa inahan sa mga bata nga iyahang napatay kaniadto.

Matud pa sa suspetsado nga nagkabuwag sila sa inahan sa mga biktima ug gidala ang upat nila ka mga anak sa Camotes diin kini nakakita og laing lalaki. Sumala pa niini nga gitug-anan siya sa iyang mga anak nga gilugos sila sa bag-ong kapuyo sa ilang inahan hinungdan nga iyahang napatay ang maong lalaki ug nabilanggo siya og duha ka tuig ug nakagawas niadto rang 2005. Human niini iyahang gikuha og balik ang mga anak ug mao na karoy mipaeskwela kanila. (BANATNEWS)