Gibugha og atsa naangol

CEBU, Philippines - Nalandig sa tambalanan ang usa ka 28-anyos nga lalaki human kini tigbasa og atsa sa iyang manghod didto sa sitio Mananga II, barangay Tabunok, dakbayan sa Talisay niadtong Miyerkules sa gabii.

Ang biktima mao si Ronnie Pacres, 28, nga taga Mananga II, samtang ang suspetsado mao ang iyang manghod nga si Cristopher Pacres, 19, silingan ra sa biktima.

Si PO3 Alfredo Cuizon sa Talisay City Police Office (TCPO) mibutyag sa Banat News nga ang suspetsado mitahan sa iyang kaugalingon nga malinawon uban sa atsa nga iyang gigamit sa pagbugha sa iyang maguwang.

Si SPO1 Oliver Dacua, duty desk officer sa TCPO nga nahinabi sa Banat News nagkanayon nga ang magsuong Pacres dugay nang nagkabangi.

Niadtong Miyerkules sa gabii gikan pa sa trabaho ang biktima dihang pag-abot niini sa ilang balay gisugat siya og atsa sa suspetsado.

Si Dacua midugang nga si Cristopher mibutyag nga na-upsan na siya og pailob sa iyang maguwang hinungdan nga iya kining gibugha sa atsa.

Nasabak ang biktima sa ulo, agtang ug tuong bukton ug gihatod dayon kini ngadto sa Talisay City District Hospital.

Samtang ang suspetado nagtingkagol na karon sa prisohan ug nagpaabot sa tukmang kiha nga isang-at batok kaniya. (BANATNEWS)