Lolo gisulong og 20 ka sikyu

CEBU, Philippines - Usa ka 61-anyos nga lolo ang mireklamong gisulong ug gitiunan sa 20 ka mga gwardiya diha sa sitio Coconut 2 sa barangay Omapad dakbayan sa Mandaue sa milabay’ng gabii.

Ang mitaho sa kapolisan sa Station 5 sa Mandaue City Police Office mao si Segundino Sanchez, 61, residente sa maong dapit kinsa pwerteng kuyawa sa iyang gidangatan.

 Matud pa ni Sanchez mga alas 10:40 sa milabay’ng adlaw samtang nakig-inom kini sa iyang mga higala, nakugang kini sa dihang miabot ang mga sakop sa TCO security agency sa iyang panimalay.

Sa dihang iyang gisita ang manager niini nga si Andres Tudtud kung unsay tuyo kalit siyang gitiunan sa ilang mga armas hinungdan sa kakuyaw nga iyang gibati.

Atol sa imbestigasyon sa kapolisan sa Station 5 si Sanchez nagduda nga ang pagkakita og lalis ni Sanchez sa usa sa mga sakop sa maong security agency sa milabay’ng adlaw maoy gidudahang motibo sa pagsulong.

Nagduda ang kapolisan nga nagpalaban sa mga kauban hinungdan nga siya gisulong sa panimalay niini ug human sa pagpanion dali usab silang miikyas.

Matud pa ni PO3 Antonio Discartin ang desk officer sa Station 5 posibleng ilang ipatawag ang mga sakop sa TCO Security agency ug ang manager niini nga si Andres Tudtud alang sa paghatag og katin-awan sa maong panghitabo. – BANAT NEWS