Nerez ibalhin sa Crame

CEBU, Philippines - Human sa usa ka tuig ug duha ka bulan nga pagserbisyo isip regional director sa kapolisan sa Central Visayas hulipan na si Chief Supt. Lani-O Nerez karung adlawa.

Si Nerez mibutyag nga nakadawat na siya og kompirmasyon gikan sa labaw sa Camp Crame nga siya idestino na sa Directorate for Research and Development isip pangulo niini.

 Matud pa ni Nerez nga human sa eleksyon gipahibalo na siya sa Camp Crame nga posibleng ibalhin siya sa laing posisyon maong wala siya makugang sa maong balita.

Midugang si Nerez upat ka regional directors ang gipilian sa Camp Crame nga maoy mabutang sa taas nga posisyon kini mao ang rehiyon 5, rehiyon 7, rehiyon 9 ug rehiyon 11.

Samtang tungod sa pagbalhin ni Nerez makadawat kini og career promotion diin kini mao ang two star-general award nga maoy nagpataas sa iyang ranggo.

Atol sa paglingkod ni Nerez walay nahitabong mga bank robberies ug walay mga dagkong insidente nga nahitabo sa lalawigan.

Dako usab ang pasalamat ni Nerez sa mga local chief executives nga misuporta gyud kaniya sa tanang buluhaton sa kapolisan.

Ang provincial director nga si Sr. Supt. Erson Digal mihulagway ni Nerez nga usa ka maayong leader ug mao gayuy mangunay sa pagsulbad sa kaso. “He’s a good leader, father and very supportive to the Cebu Province,” pasabot pa ni Digal.

Ang director usab sa kapolisan sa syudad sa Sugbo Sr. Supt. Patrocinio Comendador mihulagway usab kini nga usa ka maayong leader ug maayong modala og tawo.

“He’s a leader that I look up to in terms of his integrity capability and decisiveness,” matud pa ni Comendador.

Si Nerez hulipan unya ni Chief Supt. Ager Ontog nga naggikan sa Camp Crame nga miyembro sa Philippine Military Academy batch 1980. Samtang nasurpresa ug nasubo si Gob. Gwendolyn Garcia sa pagbalhin ni Nerez gumikan kay gianugunan siya sa maayong performance ni Nerez.

Si Nerez mihimo na sa iyang courtesy exit call kagahapon sa hapon kang Garcia apan gituki gihapon niini ang peace and order sa probinsiya partikular na sa talandugong   lungsod sa Compostela, mga listahan sa posibleng mopuli ni Nerez ug uban pa. - Chester Abadilla (BANAT NEWS)