CEBU, Philippines - Nakaangkon og samad dinunggaban sa nagkadaiyang parte sa iyang kalawasan ang usa ka DJ (disk jockey) sa Takusa KTV Bar sa C. Padilla St. barangay Alaska Mambaling ning dakbayan niadtong milabay’ng hapon.
Ang biktima mao si Robinson Bout, 34, molupyo sa nahisgutang lugar human kini kalit gisulong ug gidunggab sa suspetsadong nailhan lang niini sa pangalan nga Juanito.
Sumala pa sa imbestigasyon nga naghugas og plato ang biktima niadtong tungura dihang kalit nga miabot ang suspek dayong dunggab kaniya makadaghang higayon.
Si Bout naigo sa tuong dughan, likod ug sa tuong kamot ug daling gidala sa tambalanan sa iyang landlord nga si Efren Bacalso sa Cebu City Medical Center.
Nasuta nga ang suspek kinsa padayon pang gipangita sa kapolisan gikaaway na niini sa miaging buwan ug gituohan niyang buot mobawos. – BANAT NEWS