Ex-convict gisikop

CEBU, Philippines - Usa ka 27-anyos nga ex-convict nasikop sa mga polis human kini pasanginling nanulis sa mga pasahero sa puj niadtong Martes pasado alas 10:00 sa gabii didto sa barangay Tabunok, dakbayan sa Talisay.

Ang suspetsado mao si Japhil-Am Caballero, taga barangay Camp 5, dakbayan sa Talisay, apan kasamtangang nagpuyo sa sitio Ilang-ilang, barangay Lagtang sa maong siyudad. Nakuha nila ni PO1 Renevic Rizaldo ug PO1 Rodel Monteza gikan sa mga kamot ni Caballero ang tulo ka linikit nga marijuana ug usa ka kitchen knife nga adunay gitas-ong walo ug tunga ka pulgada.

Si Caballero maoy gitudlo ni Hazel Hisoler, hingkod ang panuigon nga usa sa mga mitulis kaniya ug sa iyang mga kaubang pasahero sa puj, alas 8:00 sa gabii sa nahisgutang adlaw.

Nadala sa suspetsado ug sa duha ka mga kauban niini ang usa ka Cherry mobile phone nga nagkantidad og P4,000 ug usa ka unit nga Apple Shuffle nagkantidad og P4,500 nga gipanag-iya sa biktima.

Si Caballero nga nahinabi sa Banat News kagahapon mihimakak sa pasangil batok kaniya ug matud niya nga naamong lang siya sa iyang mga higala nga nailhan lang niya sa ngalan nga “Michael” ug “Richard” taga sitio Mananga Tabunok.

Hinuon miangkon kini nga nakapatay siya dihang nagpanuigon pa lang siya og 12-anyos ug nasulod sa rehabilitation center alang sa mga menor de edad nga nakahimo og kalapasan sa balaod didto sa lungsod sa Argao apan pagka-edad niya og 15-anyos gidala siya ngadto sa Muntinlupa sa Manila diin sulod sa walo ka tuig niyang giserbisyohan ang iyang nahimong kalapasan.  –  BANAT NEWS