3 mil ka marijuana gilarot

CEBU, Philippines - Mikabat sa 3,000 kapin ka mga hamtong nang mga punoan sa marijuana nga gibana- banang mokantidad og dul-ang usa ka milyon ka pesos ang gipanglarot sa kapolisan sa mga plantasyon niini sa tulo ka mga sitio didto sa bukirang barangay sa Bayong sa lungsod sa Balamban niadtong Martes.

Ang kapolisan sa Balamban nga gipangulohan sa hepe niini nga si Chief/Insp. Januario Sario maoy milusad og operasyon inabagan sa kapitan sa barangay nga si Rizal Abanto ug mga tanod human madawat ang usa ka tawag sa telepono gikan sa nagpa-ilang concerned citizen nga nagpahibawo bahin sa maong mga plantasyon sa gidiling tanom.

Matud ni SPO3 Allan Patalingjug sa Balamban Police Station nga sayo sa buntag sila migikan ug naabtan gyud sila og alas 5:00 sa hapon pagpang-larot sa mga puno-an sa marijuana sa tulo ka mga lugar sa Sitio Cabatbatan, Sitio Dao ug Sitio Taro, may 17 kilometros ang gilay-on gikan sa lungsod.

Miingon si SPO3 Patalingjug nga dugay kaayo sila nahuman og larot sa maong mga puno-an tungod kay gawas nga daghan kaayo, managlahi ang lugar sa maong plantasyon nga gisagol pagtanom sa mga kamaisan ug kasagbutan aron dili mailhan.Ang ubang mga punoan sa marijuana didto ipananom sa duol nga bahin sa tubod sa tubig aron mabuhi bisan dili na bisbisan og tubig.Miingon si SPO3 Patalingjug nga hugtanon nilang gimonitor ang maong lugar tungod kay dugay na silang nakadiskobri sa katag- katag nga plantasyon sa marijuana sa maong lugar.Apan sama sa naandan walay mag-uumang nadakpan sa mga otoridad tungod kay iya-iya lang og limod ang tanang ilang gipangutana.Ang maong mga linarot kasamtangang gikustodiya sa buhatan sa kapolisan samtang nagpaabot sa kamandoan gikan sa Cebu Police Provincial Office (CPPO).  –  BANAT NEWS