CEBU, Philippines - Gikondenar sa kadagkoan sa Banat News ang nahitabong pagpanagpa sa usa ka opisyal sa Philippine National Police (PNP) ngadto sa reporter ning mantalaan niadtong Lunes.
Si Lesley Caminade gikatahong gisagpa ni Chief Insp. Vicente Velasquez, hepe sa Homicide Section sa Cebu City Police Office niadtong Lunes sa hapon.
Kini nahitabo sa dihang si Caminade nanghangyo nga mokuyog sa sakyanan nga sa pagtuo niini paingon sa usa ka operasyon nga mahimo niyang i-cover.
Apan gihulagway nga natarantar si Velasquez nga nagpaingon sa barangay T. Padilla human masayri sa opisyal sa kapolisan nga apil diay sa nasunog ang iyang panimalay.
Samtang gisabot sa mga tagdumala ning mantalaan ang nahidangatan ni Velasquez nga nasunogan, apan gitataw ni Juanito V. Jabat, publisher ug editor ning Banat News nga dili makatarunganon ang pagpanapat ngadto sa usa ka peryodista.
Ang Banat News andam sa paghatag og abogado ngadto kang Caminade kun makadesider kini sa pagpasaka og kaso.
Ang PNP-Defense Press Corps mikondenar usab sa gibuhat ni Velasquez. - BANAT NEWS