Tomas may plano sa lalawigan

CEBU, Philippines - Si kanhi Senador John Henry “Sonny” Osmeña nakapangagpas sa katuyoan ni kanhi mayor karon Kongresista Tomas Osmeña sa habagatang distrito sa siyudad sa pagsuporta sa tinguha ni Mayor Michael Rama nga pag-usab sa charter sa siyudad sa Sugbo.

Ang tuyo niini mao ang paghibalik sa katungod sa mga residente sa siyudad nga makabotar sa mga opisyal sa probinsiya.

Sumala pa ni Sonny nga adunay interes si Tomas nga modagan pagka-gobernador human sa termino ni Gob. Gwendolyn Garcia sa pagka-gobernadora sa lalawigan sa Sugbo.

Matud ni Sonny nga makaayo ang pagbotar sa mga taga-siyudad ngadto sa mga opisyal sa probinsiya aron dili na makasayonsayon sa pagkontrolar ang mga Garcia sa lalawigan sa Sugbo.

Si Sonny miingon nga ang botos gikan sa siyudad sa Sugbo igo na kaayo nga makapadaog og gobernador.

Kini tungod kay kun basehan ang Mayo 10 nga bugnong lugaynon, hapit maparot ni kanhi Konsehal Hilario Davide III si Garcia.

Gipangagpas ni Sonny nga si Tomas adunay dakong kahigayonan nga modaug batok sa kandidato nga paluyohan unya sa One Cebu Party.

Sa iyang bahin si Garcia mipakagamay lang sa pamahayag sa kanhi senador nga ang ma-neutralize unya ang mga Garcia sa higayon nga makasulod sa probinsiya si Tomas kun makabotar na ang mga taga siyudad sa Sugbo sa mga kandidato sa lalawigan.

Matud pa ni Garcia nga ang katuyoan sa paghangop sa tinguha ni Rama nga makabalik sa pagbotar sa probinsiya ang siyudad sa Sugbo mao nga magkahiusa ang tanang Sugbuanon alang sa hiniusang kaayohan ug kalambuan.

Gipasabot hinuon sa gobernadora nga angayan nga tutokan sa iyang mga kaatbang nga ang iyang partido nakakuha sa halos tanang mga kongresista ug ang 1.2 milyones ka botante sa probinsiya mas dako pa sa dili mominus 600 mil ka mga botante sa siyudad.

Mibalos hinuon si Garcia sa pag-ingon nga dili sama sa kanhi senador nga nalawos na sa politika, siya magpabilin sa Kapitolyo bisan og dili na siya gobernadora apan wala gitug-an niini kun unsa unya ang posisyon nga iyang huptan.  - BANAT NEWS