Mga vendors sa Tabunok nag-rally

CEBU, Philippines - Sobra sa 100 ka mga vendors diha sa merkado publiko sa Tabunok sa dakbayan sa Talisay ang nagpanon sa dakbayan kagahapon sa buntag aron ipadayag ang ilang pagsupak sa pagpabalhin kanila ngadto sa bag-ong merkado nga nahimutang sa barangay Lagtang.

Si Rudy Ventic, 48, presidente sa fish section nga nahinabi sa Banat News kagahapon nagkanayon nga hangyuon nila si Mayor Socrates Fernandez nga dili sila ibalhin ngadto sa Lagtang tungod kay ilahang gituohan nga maapektuhan ang ilang halin.

Matud niini nga layo ug tuyuon sa mga mangomprahay ang nahimutangan sa merkado diha sa Lagtang ug daku ang posibilidad nga ang mga mamalitay dili na molahos ngadto.

Kagahapon sa buntag ang mga mamalitay og isda napawok sa ilang pagpangompra kagahapon tungod kay wala silay isda nga napalit kay ang tanang mga vendors og isda didto man sa city hall nagpanon. Ang Tabunok dunay laing pribadong merkado nga ang luna gipanag-iya sa pamilyang Nacario ug sama sa merkado publiko ang mga vendors magbayad usab og abang sa ilang mga stalls o pwesto. Ang mga vendor diha sa merkado publiko sa Tabunok gikatakdang ibalhin karong Oktubre 1, 2010. Si Arturo Bas, public information officer (PIO) sa dakbayan sa Talisay mibutyag sa Banat News kagahapon nga gipauswag una ni Fernandez ang pagpabalhin sa mga vendors tungod sa ilang mga yangungo. Matud ni Bas nga himoan una og circumferential road ang maong merkado sa Lagtang nga magkonektar gikan sa merkado paingon ngadto sa tulay sa Mananga.

Usa sa tumong sa pagpabalhin sa merkado aron maluag ang trapiko diha sa Tabunok ug malimpiyo usab kini. Gihimakak ni Bas ang taho nga ang nahisgutang luna diha sa merkado sa Tabunok ibaligya aron matukoran kini og dakung tindahan.  – BANAT NEWS