Buenafe napilian ni Mike

CEBU, Philippines - Gipadala na kagahapon ni Mayor Michael Rama ngadto sa buhatan sa hepe sa Philippine National Police nga si Jesus Verzosa ang iyang rekomendasyon alang sa itudlo niya nga bag-ong direktor sa Cebu City Police.

Nakahukom na ang mayor nga ang kasamtangang hepe sa Regional Intelligence Division nga si Sr. Supt. Melvin Ramon  Buenafe sa Police Regional Office-7 maoy itudlo niya nga director sa kapolisan sa dakbayan.

Matud pa ni Rama nga gipaabot na lang niya ang approval gikan ni Versoza ug iya usab nga gihangyo ang dinalian nga tubag niini.

Gipasabot sa mayor nga daghan ang iyang giagiang tawo aron mangunsulta kabahin sa abilidad sa mga opisyal nga gipapilian kaniya alang sa CCPO ug sa katapusan iyang girekomendar si Buenafe.

Matud pa sa mayor nga dunay igong katakos si Buenafe ug usa sa iyang gibasehan ang pag-atiman sa kaso sa gipatay nga negosyante nga si Manuel Ting nga diin nangasikop gyud ang mga tawong responsable sa krimen.

Samtang gipadayag ni Rama nga usa sa isugyot niya kang Buenafe puhon mao ang pagpalig-on og maayo sa kampanya batok sa ginadiling drugas.

Gusto usab sa mayor nga hingusgan usab sa PNP ang ilang physical fitness programs sa rason nga may bentaha kun gamay ang mga tiyan sa polis gumikan kay dali ra sila makalihok kung dunay mga dinalian nga pagresponde.

Gipahibalo usab ni Rama nga sa higayon nga makalingkod na si Buenafe buot niyang makig-coordinate kini sa mga security agencies ug sa mga negosyante sa dakbayan aron sa pagpalapad sa pagbantay sa kahusay ug kalinaw sa siyudad.

Gusto sa mayor nga hatagan og dakong papel sa seguridad ang mga security guards sa nagkadaiyang establisamento pinaagi sa kanunay nga pag-roving sa ilang area aron usab malikayan ang mga nagkadaiyang krimen.

Dugang pa niya nga importante kaayo ang pagtinabangay karong panahona aron usab maminosan na ang mga dautang elemento. (BANATNEWS)