2 naigo sa saag nga bala

CEBU, Philippines - Duha ka tawo ang nalandig sa tambalanan human sila mangaigo sa saag nga bala didto sa barangay San Isidro,dakbayan sa Talisay niadtong Domingo sa gabii.

Ang mga biktima mao sila si Jacqueline Aleo, 28, nga taga Ramona Village, barangay San Isidro, sa maong dakbayan, ug ang katabang niini nga si Rene Pacularang , 21 .

Si Aleo nasabak sa iyang tuo nga tuhod, samtang si Pacularang naigo sa walang lukon-lukon.

Ang duha daling gidala ngadto sa South General Hospital sa dakbayan sa Naga ug si Bryan Balando, nurse on duty sa maong tambalanan mao nay mitaho sa kapolisan sa Talisay kabahin sa maong insidente.

Base sa gipahigayong imbestigasyon nila ni PO3 Arnold Damasco ug PO2 Leandro Azarcon nasayran nga ang mga biktima diha ra sa ilang balay dihang nakadungog sila og mga buto sa armas,

Wala nila hisayri kun diin gikan ang maong mga buto, apan nasayran nalang nila nga nangasamad na sila.

Sa pagkakaron padayon pang giimbistigar sa kapolisan ang maong hitabo aron pagtumbok sa nagpabuto og armas sa palibot sa nahimutangan sa mga nabiktima. (BANATNEWS)