Tanang high-profile murders sulbad na - Nerez

CEBU, Philippines - Gipangangkon ni Police Regional Office- director Lani-O Nerez nga nasulbad na nila ang kadaghanan sa high-profile crimes sa dakbayan sa Sugbu ug sa lalawigan tungod sa pagkasikop ug pagkaila sa mga gikatahapan ug gikatakda na nilang pasakaan og kaso.

Si Nerez mibutyag nga mapasaka na ang kaso batok sa nailhan apan wala pa madakping suspeks pagpamusil sa tulo ka sakop sa City of Bogo Anticrime Task Force sa dakbayan sa Bogo.

Nasulbad na usab ang pag-ambush kang kanhi Compostela mayor Joselito Reynes human ilang nadakpan ang giingong “look out” nga si Dominador Viloria Sr. ug anak niini nga si Dominador Jr. ug ila na sab nailhan ang killer niini.

Samtang sa kaso ni Engr. Ciriaco Salazar sa Department of Public Works and Highways nadakpan na usab.

Samtang sa pagbanhig sa negosyanteng babaye nga si Debbie Yu, napasakaan na og kaso ang gitumbok nga mastermind nga usa usab ka babaye lakip na ang giingong lookout niini nga nadakpan sa kapulisan sa dakbayan sa Mandaue duha ka adlaw human sa ambush nga miresulta sa kamatayon sa drayber niining si Sonny Boy Mahilum.

Laing nadakpan sa kapulisan mao ang mibanhig patay kang Rufino Deresas niadtong Sabado sa buntag diha sa Guadalupe.

Sa kaso sa pagpatay sa magtutudlo nga si Serafin Villahermosa sa Tubod National High School sa Minglanilla sumala pang Nerez dili magdugay mapasakaan na og kaso ang mastermind human madakpi ang gitumbok nga drayber sa getaway vehicle nga si Maximo Tanudtanud alyas Imuk. Matud ni Nerez nga kasagaran sa maong krimen may kalambigitan sa trabaho ug personal nga panagbangi. (BANATNEWS)