Ulitawo miluba sa kapuyo nag-unay

CEBU, Philippines – Gumikan sa panaglalis, gidunggab sa usa ka ulitawo ang kapuyo niyang dalaga dayon giunay usab niya og luba ang iyang tiyan didto sa ilang balay sa sitio Zapatera, barangay Luz ning dakbayan sa Sugbo sa miaging gabii.

Ang suspetsado mao si Johnrey Baguio Atis, 27, samtang ang biktima mao si Junalyn Abella Villejo, 22, nga kapuyo sa suspek .

Sumala sa kapolisan nga nasuko ang suspetsado dihang nananghid kaniya ang biktima nga mouli una kini sa balay sa iyang mga ginikanan sa barangay Bangkal, syudad sa Lapu-lapu.

Didto magsugod ang panaglalis sa duha nga dihang wala na makaantos sa kasuko gilanit sa suspetsado ang iyang kutsilyo ug diha-diha gihansakan ang tiyan sa biktima.

Sa pagtuo niyang mamatay ang biktima, giluba usab dayon niya ang iyang tiyan apan wala kini ipapuok gumikan sa kasakit ug nangahagba sila sa sawog sa ilang balay nga naglunang sa kaugalingon nilang dugo.

Si Dexter nga igsoon sa suspetsado kinsa nakadungog og singgit gikan sa gipuy-ang balay sa suspetsado ug sa biktima, maoy unang misil-ing sa maong lugar ug dihang nakita niini nga pulos pa may kinabuhi ang duha, gihatud dayon ngadto sa Vicente Sotto Memorial Medical Center ang suspetsado, samtang sa Cebu City Medical Center usab dad-a ang biktima. (BANATNEWS)