Nagmotor dasmaga'g de karga

CEBU, Philippines – Talandugon ang kahimtang sa usa ka 26 anyos nga lalaki human madasmagi sa trak de karga ang iyang gemanihong motorsiklo didto sa highway sa barangay Poblacion, lungsod sa Lilo-an niadtong Huwebes sa alas 2:50 sa hapon.

Ang biktima mao si Alfredo Sapio, 26 , minyo, nga taga Liloan samtang ang nakadasmag kaniya mao ang Mitsubishi Canter nga gimaneho ni Davis John Ongkik Lasat, 41 , ulitawo, lumad nga taga siyudad sa Davao apan kasamtangang nagpuyo sa barangay Cubacub, siyudad sa Mandaue.

Si PO3 Raul Flores sa Lilo-an Police Station mibutyag sa Banat News nga ang Mitsubishi Canter paingon sa amihanang bahin nga direksiyon samtang ang motorsiklo nga gimaneho sa biktima gikan usab sa sudlonon nga bahin sa Poblacion, Liloan.

Apan sa dihang mitabuk na ang biktima sa karsada wala kini makabantay sa nagbaguros nga trak de karga hinungdan nga nadasmagan kini ug naguyod pa og pipila ka metro ug ang iyang motorsiklo puwerting pagkagusbata.

Gihatod dayon ang biktima ngadto sa Velez General Hospital sa dakbayan sa Sugbo samtang ang drayber sa trak de karga boluntaryong mitahan sa iyang kaugalingon ug nagtingkagol na karon sa karsel samtang nagpaabot sa tukmang sumbong nga ipasaka batok kaniya. (BANATNEWS)