Sikyu nanghinol og sampot sa dalaga gipriso

CEBU, Philippines – Usa ka giingong hubog nga security guard gibalhog sa prisohan sa dakbayan sa Talisay human kini ireklamong nanghikap og sampot sa usa ka dalaga didto sa Maharlika Street, barangay Bulacao, sa maong dakbayan kagahapon sa kaadlawon.

Ang biktima mao si Mae-El Buligan, 20-, dalaga, taga Friendly Homes, Mansueto, Subdivision, barangay Bulacao, Talisay kinsa naninda sa lugar nga nahitaboan.

Samtang ang suspetsado mao usab si Jose Lauron, 48, ulitawo, apan adunay kapuyo, ug may mga anak na, nga taga barangay Bacay, lungsod sa Minglanilla.

Si Lauron nasikop sa grupo nila ni PO1 Rico Reboquio, PO1 Rosauro Pasumala ug PO1 Adorberto Carba Jr. human mosumbong si Buligan ngadto sa Talisay City Police Station sa barangay Poblacion bahin sa gibuhat sa suspetsado kaniya.

Base sa imbestigasyon ni PO1 Violeta Godines sa Women and Children Protection Desk nga sa mga alas 3:30 kagahapon sa kaadlawon si Lauron kinsa giingong hubog nanuktok sa tindahan sa biktima kay mopalit siya og soft drink.

Si Buligan mibangon ug giablihan ang pultahan sa tindahan ug dayong gawas niini.

Apan puwerting kurata niya kay kalit mang gihikap ni Lauron ang iyang sampot.

Gumikan niini mihiwasa sa kasuko ang biktima ug gibadlong si Lauron uban sa pasidaan nga kun buhaton pa ni Lauron pag-usab iya kining labayon og bato.

Unya si Lauron imbis mangayo og pasaylo, nasuko hinuon ug gihana-an pa niini og labay og botilya sa bino ang biktima.

Human sa maong engkwentro si Lauron mibiya sa tindahan ni Buligan ug mibalik ngadto sa establisamentong iyang gibantayan apan nianang pagka-alas 5:00 sa buntag, mibalik na usab kini sa tindahan ni Buligan ug mipalit na usab og soft drink.

Malagmit giganahang nagsil-ing sa sampot ni Buligan, wala kini makaantos, gihikap na usab ang sampot sa biktima hinungdan nga mikisikisi si Buligan sa hilabihang kapungot.

Unya si Lauron nga misumbalik og kasuko kang Buligan, giingong nanghulga na kini sa biktima pinaagi sa masuk-anong tingog nga nagkanayon “ayaw pag-ingon ana ha, kay kuhaon ko tong akong shot gun kay pwede ta mong pusilon” dayong lakaw niini balik na usab ngadto sa iyang gibantayang establisamento.

Si Lauron niadtong higayona nag-duty apan wala magsul-ob og uniporme, nag-tsinelas lang, ug nagsul-ob og t-shirt ug short pants.

Dihang nahiabot ang kapolisan,wala hinuon mosukol ang suspetsado ug didto na mahuwasi sa iyang kalasbag sa sulod sa karsel.  (BANATNEWS)