Airport gipaubos sa red alert

CEBU, Philippines – Gipaubos karon sa red alert status ang siguridad sa tugpahanan sa Mactan Cebu International Airport (MCIA) human sa pagpamomba didto sa International Airport sa dakbayan sa Zamboanga sa milabay’ng gabii diin namatyan og duha ka tawo samtang 22 usab ang naangol.

Matud pa ni Chief, P/SSupt. Joselito Salido sa Police Center for Aviation Security (PCAS)7 nga dili angayang ibalewala ang maong pagpamomba kay mas daghan ang mga pasahero sa MCIA nga mobiyahe ngadto sa nagkalainlaing destinasyon dinhi sa nasud ug ngadto sa gawas sa nasud kun itandi sa tugpahanan sa Zamboanga.

Gumikan niini hugot nga siguridad ang ilang gipatuman sa maong tugpahanan ug gibantayan kini karon sulod sa 24 oras busa walay gitugutang mopalta sa maong mga polis.

Matud pa ni SSupt. Salido nga samtang may mohiling sa mga lawas ug kargamento sa mga pasahero, anaa usab ang daghang mga polis nga magbantay sa palibot aron dali ra kining makalihok ilabi na kun may masakpang magdala og bomba o kaha sa kargamento sa mga pasahero ug ubang tawo nga kadudahan ang lihok.

Samtang gipun-an usab og mga security guard (blue guard) ang MCIA nga gidestino sa arrival ug departure area sa tugpahanan nga magmonitor sa tanang pasahero nga mosulod ug mogawas sa maong lugar.

Gumikan niini walay kompiyansa ang mga kadagkoan sa MCIA ug higpit nga gidid-an ang mga kabanay nga mohatod sa mga molargang pasahero ug mosugat usab sa mga bag-ong motugpa, sa pagsulod sa tugpahanan.

May katahap ang mga otoridad sa tugpahanan sa Zamboanga nga gikan sa usa ka suicide bomber ang miulbong bomba nga mikalas sa 2 ka tawo ug miangol sa laing 22. (BANATNEWS)