Vidal, laing pito gipasidunggan sa kapitolyo

CEBU, Philippines – Gipasidunggan si Cebu Archbishop Ricardo Cardinal Vidal sa kagamhanan sa lalawigan sa Sugbu sa labing taas nga pasidungog sa probinsiya sa Sugbu nga mao ang Order of Lapu-lapu award.

Si Gob. Gwendolyn Garcia maoy nangunay sa paghatag sa maong pasidungog ngadto kang Vidal kagabii atol sa Garbo sa Sugbu Awarding ceremony sa Capitol Social Hall.

Gawas ni Vidal, mihatag usab og pasidungog ang gobernadora ngadto sa pito ka mga Sugbuanon sa Garbo sa Sugbu Awards nga gilangkoban nila ni Department of Energy Secretary Jose Rene Almendras alang sa Leadership and Sustainable Development; JG Summit Holdings Chairman Emeritus John Gokongwie Jr. alang sa Entrepreneurship and Business Development; Norkis Chairman, Dr. Norberto Quisumbing Jr. alang sa Entrepreneurship and Community Development; Visual Artist Sofronio Mendoza sa Visual Arts; USC Professor Emeritus Dr. Resil Mojares sa Cebuano Literature and History; singer nga si Dulce sa Music and Performing Arts; ug USC College of Arts and Sciences Dean Dr. Ramon Del Flerro sa Education.

Matud pa ni Garcia nga ang rason nga ilang pasidunggan si Vidal mao ang dul-an sa 30 na ka tuig nga “unselfish and dedicated service to the Cebuanos.”

Usa sa mga basehanan sa pagpili sa mahatagan sa maong matang sa pasidungog mao ang pagsanong usab sa tanang mga Sugbuanon nga mapasidunggan si Vidal. (BANATNEWS)