Motor vs. SUV 1 patay, 1 angol

CEBU, Philippines – Patay ang usa ka lalaki ug samdan ang usa ka babaye human mobangga ang ilang gisakyang motorsiklo ngadto sa usa ka sakyanan pasado alas-5 sa buntag sa sitio Lower Busay, barangay Busay ning dakbayan kagahapon sa kaadlawon.

Ang namatay mao si Arnold Amor, 28, nga maoy nagmaneho sa motorsiklo nga adunay plate number nga GL-9408 samtang naangol ang iyang angkas nga si Fernandita Bacalya, 46, molupyo sa dalan Salvador sa barangay Labangon.

Sa pakighinabi sa Banat News ni SPO4 Ronilo Ermac base sa imbestigasyon padulong sa may JY Square sa Lahug ang mga biktima apan sa pagliko niini sa usa ka kurbadahon sa Lower Busay misampak kini sa nagtungas nga Honda CRV sports utility vehicle (SUV) nga gimaneho ni Dean Pasket, 20.

Tungod sa kakusog sa impact sa pagkabangga ni Amor maayong pagkalagpot niini ug nadarok sa SUV nga nag-una ang ulo hinungdan sa iyang hinanaling kamatayon.

Samtang ang iyang angkas nga si Bacalya maayo usab nga pagkalagpot ug daling gidala sa Cebu City Medical Center apan gibalhin kini sa Visayas Community Medical Center.

Matud pa ni Ermac nga posibleng kusog ang pagpadagan ni Amor hinungdan nga wala na kini makakontrolar sa manobela ug wala usab makabantay sa SUV gumikan sa blind curve. (BANATNEWS)