Gipataysa wala pa ang husay

CEBU, Philippines – Patay nang nakit-an ang usa ka mananagat nga naglutaw sa dagat nga gidudahang giunay og patay sa kaubang mananagat diha sa sitio Lawis barangay Jugan sa lungsod sa Consolacion kagahapon sa alas 6:15 sa buntag.

Ang biktima mao si Joel Magale, 46, molupyo sa maong lugar, samtang ang gitumbok nga suspek mao si Rolando Antisuela, 22, nagpuyo gihapon sa maong dapit.

Matud pa ni PO2 Ritchie Gapo sa Consolacion Police Station dihang nahinabi sa Banat News ang biktima nakit-ang wala nay kinabuhi sa dagat sayo sa buntag sa mga kauban niyang mga mananagat.

Nasuta sa imbestigasyon nga ang biktima ug ang gitumbok nga suspek nagkaaway tulo ka adlaw na ang nakalabay ug gikatakda untang husayon sa barangay kapitan kagahapong adlawa.

Gikataho nga ang panag-ilogay sa pwesto nga dahikanan o butanganan sa ilang sakayan daplin sa dagat maoy gibangian sa duha wala na mopakita ang suspek sukad nga nadiskubrehan ang biktima. (BANATNEWS)