Laing ambush, drayber patay

CEBU, Philippines – Patay ang usa ka lalaki kini human gipaulanan og bala sa duha ka tawong nagmotorsiklo pasado alas-6 sa buntag kagahapon sa eskina sa dalan F. Llamas ug Tauros sa barangay Guadalupe.

Ang biktima nailhan nga si Rufino Recerote Deresas, 52, usa ka drayber ug molupyo sa sitio Anahaw Nazareth sa barangay Buhisan.

Base sa imbestigasyon sa kapolisan nasayran nga ang biktima nagmaneho sa usa ka multicab nga nagtangag sa plaka nga GMD-826 uban sa delivery boy nga si Ariel Aquinio.

Ang duruha naghatud sa nahisgutang lugar og mga ampaw ug piyaya sa dihang kalit nga   gituparan og duha ka lalaki nga nagmotor ug walay daghang pangutana kalit nga mipaulan kanila og bala.

Si Aquinio daling nakalayat sa sakyanan ug misakay og habal-habal padulong sa balay sa ilang agalon nga si Nelson Sabado ug mipahibalo sa nahitabo.

Sa pakisusi sa kapolisan sa maong lugar ang biktima nagbuy-od sulod sa iyang gimanehong sakyanan ug wala nay kinabuhi.

Nakaangkon kini og samad pinusilan sa walang bukton, abaga ug duha ka samad pinusilan sa walang bahin sa iyang lawas nga gituohang nakaingon sa hinanali niining kamatayon.

Samtang sa pakisusi sa crime scene nakuha sa kapolisan ang tulo ka kabhang sa kalibre .45 ug duha ka deformed slugs niini.

Ang hepe sa kapolisan sa syudad sa Sugbu, Sr. Supt. Patrocinio Comendador wala pa mohatag og pamahayag kabahin sa posibleng motibo sa maong pagpamanhig.

Masaligon hinuon kining ilaha rang mailhan ang mga gikatahapan. Nasuta nga miyembro sa Twelve-G Labangon Drivers Association Inc. base sa ID nga nakuha kaniya ug usa sa mipirma niini mao   si Jaime Paglinawan sa Alyansang Makabayan-Sugbu.

Samtang gipatawag usab ni Comendador ang tanang hepe sa syudad sa Sugbo kini aron ipatuman ang higpit nga checkpoint ug pagpahunong sa mga motorsiklo ilabi na sa mga lalaking mag-riding in tandem.

Ang ambush kagahapong adlawa mao na ang ika-unom nga panghitabo sa ambush sa lalawigan ug syudad sa Sugbo sulod ning duha ka bulan. (BANATNEWS)