CEBU, Philippines - Gihulipan sa miaging adlaw ang pangulo sa 78th Infantry Batallion sa Philippine Army nga si Lt. Col Raymundo Banares.
Ang mihulip kang Banares mao si Lt. Col. Nolasco Mimpin ug ang turn over of command gipahigayon niadtong Huwebes sa buntag didto sa barangay Nangka lungsod sa Balamban.
Sa maong kalihokan mitambong si Major General Arthur Tabaquero sa 8th Infantry Division kinsa miawhag sa mopuli kang Banares nga kinahanglang labi pang ayuhon ang pagdumala sa 78th I.B.
Si Mimpin usa ka graduate sa Philippine Military Academy (PMA) class 1990.
Kun kahinumdoman nga ubos sa pagdumala ni Banares sa 78th I.B nadeklarar nga insurgency free ang tibuok lalawigan sa Sugbo.
Si Banares magpabilin gihapon sa Central Command isip bag-ong group commander sa 7th Regional Community Defense Group (7RCDG).
Mipasalig hinuon ang bag-ong commander sa 78th I.B nga iyang ipadayon ang programa nga nasugdan na ni Banares ug ingon man ang pagmentinar sa kahapsay ug kalinaw sa tibuok lalawigan.
Gawas niini miingon si Mimpin nga andam siyang moabag sa kapolisan sa probinsya kun gikinahanglan ang ilang presensya ilabina sa pagpatunhay sa kahusay’g kalinaw.
Si Banares dako kaayo og natabang sa kapolisan nga nagmalampuson ang milabay nga piniliay niadtong Mayo 10, 2010 nga walay mga dagkong hitabo kay nipatuman sila sa hugot nga pagbantay sa seguridad sa tibuok lalawigan
Lakip sa malampusong kampanya ni Banares nga nahimong insurgency free ang tibuok lalawigan mao ang pagpasurender niadtong mga kanhi sakop sa Rebeldeng New Peoples Army (NPA) uban sa ilang tag-as nga kalibre sa armas de fuego bugti sa gitanyag sa gobiyerno nga panginabuhian.
Ang programa sa military nga “Balik Baril” program maoy dako nga natabang sa kanhi mga rebeldeng mibalik sa sabakan sa balaod tungod kay matag armas nga ilang itahan may bugti nga kwarta nga gihatag sa kadagkuan sa Central Command. - Rey B. Pasaporte ug Lesley Caminade (BANAT NEWS)