Bana sa policewoman gitusak sa bala

CEBU, Philippines - Swerteng nakalingkawas sa tinong kamatayon ang 35-anyos nga bana sa usa ka policewoman human kini gipusil makadaghang higayon sa tawong iyang gi komedyahan ug nasuko diha sa barangay Poblacion lungsod sa Argao kagahapon sa alas 12:30 sa kaadlawon.

Ang biktima mao si Edgar Gevera Rufo, 35, molupyo sa sitio Looc, Poblacion ug bana ni PO2 Analie Rufo, samtang ang suspek mao si Carilito Camirino Jr., alyas Bulatso, minyo ug molupyo sa barangay Humgaw Argao.

Matud ni PO1 Arnold Frenal sa Argao Police Station dihang nahinabi sa Banat News, ang biktima nakaangkon og daghang samad pinusilan sa walang abaga, bukton, hawak ug kamot.

Subay sa inisyal nga imbestigasyon ang biktima mibisita sa panimalay sa iyang barkada nga si Elmer Amarillo sa maong lugar ug pagkahuman dihang paingon na untang mopaandar sa motorsiklo aron mouli kalit nga miduol ang suspek ug mipusil kaniya makadaghang higayon.

Sa unang pagpamusil naigo dayun sa hawak ang biktima apan nakapaandar kini sa motor ug nakapadagan pahilayo samtang nagpunay og pusil ang suspek hinungdan nga naigo sa ubang bahin sa lawas.

Ang biktima didto molahos sa buhatan sa kapulisan kay nahadlok nga sundan sa suspek diha sa tambalanan ug ang kapulisan na maoy mihatud kaniya sa Isidro Kintanar Memorial Hospital.

Daling gilusad sa kapulisan ang manhunt operation apan nakasibat na ang suspek samtang ang biktima gibalhin sa South General Hospital sa siyudad sa Naga tungod sa delikadong kahimtang.

Dugang nahipos nga impormasyon sa kapulisan nga giingong gisigehan og komedya sa biktima ang suspek sa wala pa ang hitabo ug gituohang wala makauyon niini ang suspek maong gibawsan kini. – BANAT NEWS