CEBU, Philippines - Nasikop ang miyembro sa sindikato sa drugas nga naglihok dinhi sa dakbayan ug probinsya sa Sugbu atol sa buy bust operation sa mga ahente sa Philippine Drug Enforcement Agency (PDEA)-7 sa miaging gabii diha sa Cabigon Street, sa barangay Sambag Uno ning siyudad.
Lakip sa nasikop ang trabahante sa Land Transportation Franchising and Regulatory Board (LTFRB)-7 nga diha sa dapit nga si Roy Abaqueta, 32, nga taga Tungkil, Minglanilla ug utility worker sa LTFRB, Ronald Jabil, 38, taga Banhigan lungsod sa Badian ug ang subject sa operasyon nga si Yancy Dayag, 34.
Si Jessie Tabanao tigpamaba sa PDEA-7 nga nahinabi sa Banat News mibutyag nga si Dayag miyembro sa Dayag Drug Group nga gipangulohan sa usa ka ginganlan og Douglas nga taga lungsod sa Ronda.
Si Douglas anaa na karun sa Cebu Provincial Rehabilitation Center (CPDRC) human masikop kaniadto sa Provincial Intelligence Branch (PIB).
Ang PDEA-7 migamit og P300 isip marked money atol sa buybust bugti sa usa ka paketeng shabu nga miresulta sa iyang pagkasikop.
Gawas sa usa ka paketeng gituuhang shabu nakuhaan sa iyang posesyon si Dayag ug usa ka dakong putos sa shabu nga mitimbang og 1/8 gramos ug .45 nga kalibre sa armas, dunay magazine ug lima ka buhing bala.
Sila si Abaqueta ug Jabil giapil pagsikop gumikan sa ilang presensya sa balay sa drug suspect ug gituohan silang mopalit og shabu aron suyopon usab sa balay ni Dayag nga naila nang ‘bangag’ kon suyupanan.
Si Tabanao nagkanayon nga subay sa nahipos nilang impormasyon si Dayag maoy nag- supply og shabu sa tulo ka barangay dinhi sa dakbayan ug ingon man sa lalawigan partikular na niini ang lungsod sa Ronda.
Gawas niini nakadawat usab sila og reklamo nga daghang mga tinun-an sa kolehiyo, trabahante sa gobiyerno ug maestro sa mga medical courses ang mosulod sa balay ni Dayag aron mopalit og shabu ug adto sab nila kini gamiton, lakip sa kanunay nilang masigpatan si Abaqueta atol sa surveillance nila diha sa maong balay.
Matud ni Tabanao si Dayag ilang pasakaan sa Section 5, 6 ug 12 sa Republic Act 9165 ingon man illegal possession of firearms. Samtang sila si Abaqueta ug Jabil ilang pasakaan sa Section 7 sa RA 9165 kun visiting drug den. – BANAT NEWS