Radaza uyon nga ibutang sa private sector ang ilang representante

CEBU, Philippines - Miuyon si Lapulapu City Mayor Paz Radaza sa sugyot ni Cebu Gob. Gwendolyn Garcia nga “private sector representative” lang ang mamahimong kasudlan sa usa ka representante sa dakbayan sa Lapulapu ngadto sa Mactan Cebu International Airport Authority Board (MCIAA).

 “It’s a good start,” matud pa ni Radaza atol sa regular nga press conference sa mga sakop sa media sa milabay’ng adlaw.

Matud pa ni Radaza nga wala siyay supak kung usa ka residente sa dakbayan sa Lapulapu ang mapili nga makasulod sa board ug dili ang usa ka sakop sa Local Government Unit o LGU.

Nanghinaut usab si Radaza nga dili sagulan og pamolitika ang pagtudlo sa makalingkod sa board ug ikunsiderar sa board ang nahimo sa usa ka representante ngadto sa mga Oponganons.

Gumikan niini gipadayag ni Radaza nga mas maayong masayod silang daan kung kinsa ang girekomendar sa board nga masulod isip board member aron ilaha kining masuta kung angayan ba kining mahimong representante ug mahatagan og giya.

Kahinumduman nga si Garcia mipadayag nga dili na kinahanglan nga usbon pa ang charter sa MCIAA board alang sa pagbutang og representasyon sa dakbayan sa Lapulapu.

Matud pa ni Garcia pwede silang mopili og usa ka representante gikan sa dakbayan sa Lapulapu apan kinahanglang masakop kini sa “Private Sector Representative” sa maong board.

Sa panahon ni kanhi Lapulapu City Mayor Ernest “Jun” Weigle siya maoy milingkod sa MCIAA Board isip Private Sector Representative sa dakbayan sa Lapulapu.

Una niini mipadayag si Radaza nga law-ay kaayo nga walay representasyon ang dakbayan sa Lapulapu sa MCIAA Board diin nahimutang ang tugpahanan sa dakbayan sa Lapulapu. – BANAT NEWS