CEBU, Philippines - Gibuk-an sa ulo ang usa ka 34-anyos nga lalaki human kini gipusil sa iyang paggawas sa pinuy-anan nga hubog gikan nga nag-inom sa sitio Suba, Poblacion lungsod sa Argao niadtong Miyerkules sa alas 11:10 sa gabii.
Ang biktima mao si Janell Banaay Ceniza, 34, way klarong trabaho, lumad nga taga lungsod sa Moalboal ug kasamtangang nagpuyo sa nahisgutang lugar.
Samtang ang suspek gihulagway nga usa ka hamtong nga lalaki nga sakay og motorsiklo.
Matud ni PO2 Benjamen Gerozaga sa Argao Police Station dihang nahinabi sa Banat News, ang biktima kauban sa iyang barkada nga wala makuha ang pangalan nag-inom sulod sa balay niini apan human sa ilang inom migawas kini aron magpahangin.
Matud pa nga kalit lang nadunggan sa mga kabanay sa biktima ang lanog nga buto sa armas ug dangtan og pipila ka gutlo misunod ang kusog kaayong tingog sa makina sa motorsiklo pahilayo.
Hinungdan nga dali nilang gisusi ang gawas ug diha nila nakit-an ang biktima nga nagbuy-od nga naglunang sa kaugalingong dugo ug may samad pinusilan sa sentro sa ulo nga maoy nakaingon sa hinanali niining kamatayon ug wala na madala pa sa tambalanan.
Ang kapulisan padayon pa sa ilang imbestigasyon ug manhunt operation pagtumbok sa responsable sa krimen. – BANAT NEWS