29-anyos gipatay

CEBU, Philippines - Patay ang usa ka 29-anyos nga lalaki human kini pusila sa wala mailhing kriminal kagahapon sa kaadlawon diha sa sitio Tunga, barangay Tanke, dakbayan sa Talisay.

Ang biktima giila nila ni PO3 Arnold Damasco ug PO2 Leandro Azarcon nga si Jerome Villoria, taga sitio Proper, barangay San Roque, Talisay kinsa kalit lang gipusil sa mamumuno samtang naglakaw diha sa sudlonong lugar sa sitio Tunga.

Si Villoria nga nakaangkon og usa ka samad pinusilan sa agtang, tuong abaga, tuong paa ug duha sa tuong bahin sa tiyan wala na makaabot nga buhi sa Talisay City District Hospital.

Ang mga polis naka-recover og upat ka kabhang sa bala sa kalibre .45 nga pistola diha sa lugar nga nahitaboan. Si Azarcon nga nahinabi sa Banat News kagahapon nagkanayon nga dunay nakabati nga ang kriminal dunay laing kuyog ug nagkinataw-anay pa nga nagkanayon “patay na to bay, patay na to bay” samtang naglakaw padulong sa sulod.

Si Supt. Henry Biñas nagkanayon nga sagad sa mga pagpamusil sa maong dapit pulos may kalambigitan sa ilegal nga drugas. Niadtong milabay’ng semana ang ig-agaw ni Villoria nga si Winlobe Villoria gipusil diha sa sitio Galaxy. – BANAT NEWS