Radaza way napiling polis

CEBU, Philippines - Si Mayor Paz Radaza sa dakbayan sa Lapulapu walay napili sa lima ka opisyal sa kapolisan nga girekomendar nga ihulip kang P/SSupt. Mariano Natu-el Jr. isip Director sa Lapulapu City Police Office.

Matud ni Radaza nga iyang giuli ngadto sa Police Regional Office (PRO) 7 ang lima ka mga ngalan nga gipapilian kaniya kay nakita niya nga walay kasinatian sa trabaho sa pamolis ang maong mga opisyal.

Ang girekomendar ug gipapilian sa mayor nga ihulip kang Natuel mao sila ni P/SSupt. Paquito Belandres nga nakaserbisyo na sa LLCPO, P/SSupt. Joselito Salido ang Chief sa Police Center for Aviation Security o PCAS 7, P/SSupt. Fortunato Gatdula Guerrero, P/SSupt. Jene Ferrer ug P/SSupt. Ernesto Agas nga gikan sa Maritime 7. Gumikan niini gihangyo pag-usab ni Radaza si PRO 7 Regional Director P/CSupt. Lani-O Nerez nga mosumiter og laing lima ka ngalan kaniya pamasin nga may mapili na siya niini.

Matud pa sa mayor nga mas maayo ang usa ka opisyal nga may kahanas na sa pakigbisog batok sa mga illegal nga kalihukan.

Walay plano si Radaza nga morekomendar og usa ka opisyal nga ilakip sa papilian kaniya aron dili siya akusahan nga adunay gipaborang opisyal.

Giangkon usab niya nga iya untang pabalikon si P/SSupt. Louie Oppus apan atua na kini sa Kampo Crame ug naghupot na og mas taas nga posisyon sa Philippine National Police.  (BANAT NEWS)