Batan-on nga Muslim napusilan

CEBU, Philippines - Nabuslot ang aping sa usa ka batan-ong lalaki human kini gipusil sa Sitio Iba, barangay Basak, dakbayan sa Lapulapu sa milabay’ng gabii.

Ang biktima mao si Nasim Manao, 18, ulitawo nga Muslim ug residente sa maong dapit.

Sa pasiunang imbestigasyon sa kapolisan, nasuta nga mga alas 11 sa milabay’ng gabii samtang kuyog si Manao sa iyang mga higalang babaye nag-inom sa usa ka tindahan, usa ka lalaki ang kalit miduol ngadto kanila.

Pipila ka gutlo kalit nga mibunot og armas nga mobuto ang lalaki ug dayong pusil ngadto sa biktima.

Si Manao nga nahiagum og samad pinusilan sa iyang aping gidala sa Lapulapu City Hospital ug gibalhin sa Vicente Sotto Memorial Medical Center ug padayong giatiman sa mga mananambal.

Samtang daling nakasibat ang namusil agi sa mga kabalayan.

Nagduda ang kapolisan nga si Manao ug ang namusil nagka-atraso.

Ang kapolisan pakyas sa pagkuha sa diskripsiyon sa namusil human ang mga kaubang babaye ni Manao wala makaklaro sa panagway niini gumikan kay mitago kini atol sa pagpusil.

Si SPO2 Rolito Jumao-as nagduda nga dunay gikakontra si Manao ug posibleng panimalos ang motibo sa insidente. (BANAT NEWS)