Pamilya sa gipatay'ng ex-mayor misinggit og hustisya

CEBU, Philippines - Samtang gisinggit sa pamilyang Reynes sa Compostela ang hustisya alang sa kamatayon sa gibanhigan-patay nga si kanhi Mayor Joselito “Cocoy” Reynes, ang kapolisan miimbitar og unom ka mga tawo aron ipa-ubos sa interogasyon.

Si Agustina Reynes, 62, nga nahinabi sa Banat News nagkanayon nga manghinaot siya nga mapadali ang imbestigasyon aron mailhan ug madakpan ang mipatay sa iyang bana nga si Joselito.

Matud ni Agustina nga sa pagkakaron wala pa siyay gidudahan nga mipatay sa iyang bana sanglit wala man kini makakita og kontra sukad pa kaniadto nga nahimong mayor ug konsehal hangtod natapos ang termino niini niadtong milabay’ng eleksyon hangtod gihimo kining campaign manager ni Mayor-elect Joel Quiño.

Si Agustina miingon nga sakit kaayo alang kaniya ang gidangatan sa iyang bana ug gihulagway nga bayolente ra kaayo ang pagpatay sa iyang bana nga sukad-masukad mao pa kini unang insidente nga dunay gipusil nga politiko sa lungsod.

Gibutyag niya nga bisan tuod og nahimong campaign manager ni Quiño iyang bana, apan wala siya makatimaan nga dunay nadawat nga hulga ang iyang bana sanglit wala man kini gikaaway sa ilang lungsod.

“Kana raman iyang pagkuyog-kuyog sa akong bana ni Quiño didto sa DILG-Manila kay nagpaloap nianang kaso nila,” matud pang Agustina.

Matud niya nga human sa eleksyon nga nakadaug si Quiño, ang iyang bana mao unta diay himuong municipal administrator sa lungsod.

Nabalaka siya nga kun dili mahatagan og dinaliang kasulbaran sa kapolisan ang pagbanhig-patay sa iyang bana, gihulagway niini nga peligro na kaayo ang Compostela kay posibling duna pa unyay laing mabiktima sa pagpamusil sa ilang lungsod.

Si Sr. Supt. Erson Digal, hepe sa kapolisan sa lalawigan, uban ni Compostela OIC Mayor Pedro Noval mibisita kagahapon sa udto sa haya ni Reynes didto sa barangay Cogon.

Si Reynes gikatakdang ilubong karong Agosto 14 sa alas 2 sa hapon diha sa sam-ang katoliko sa lungsod sa Compostela.

Matud ni Digal nga sa unom ka tawo nga giimbitar sa kapolisan, upat lang ang mitunga kagahapon sa Compostela Police Station -– tulo kanila mga lalaki ug usa ka babaye.

Ang upat gidala sa Cebu Provincial Police Office (CPPO) samtang ang duha giingong misibat ug wala na sa ilang pinuy-anan.

Gawas sa usa ka eyewitness, aduna pay laing testigo nga kuhaan og affidavit.

Si Compostela Police Office chief Sr. Insp. Rodrigo Giangan miingon nga aduna na silay natumbok nga mamumuno ni Reynes, apan nagdumili kini sa paghulagway niini sanglit nagpadayon pa ang imbestigasyon.

Usa ka team sa Special Reaction Unit (SRU-7) ang gibalik og padala sa Compostela human sa hitabo. Samtang si Quiño butangan og police escort sulod lang sa 15 ka adlaw. (Rey Pasaporte ug Darrel Carumba) (BANAT NEWS)