Namatay sa 'sex'

CEBU, Philippines - Napalgang patay na kagahapon sa buntag ibabaw sa kama sulod sa usa ka cottage sa beach resort ang usa ka negosyante nga gituohang gi-atake taliwala sa pagpakighilawas sa gikakuyog niining babaye.

Nahitabo kini sulod sa usa ka beach resort sa barangay Taytay, dakbayan sa Danao alas 11 pasado ang takna sa miaging gabii.

Ang namatay ang usa ka Alfie (tinuod nga ngalan gipugngan), kapin sa 50 ang edad, minyo ug molupyo sa usa ka barangay sa dakbayan sa Sugbo.

Si Alfie kuyog sa usa ka wala mailhing babaye nga mi-check in sa resort, apan gituhoang misibat kini sa dihang gi-atake si Alfie ug namatay.

Si SPO4 Joselito Salingua sa Danao Police Station nga nahinabi sa Banat News miingon nga si Alfie tag-iya og punerarya sa kalungsoran sa amihanang Sugbo.

Matud pa ni SPO4 Salingua nga sa ilang imbestigasyon nga gihimo ilang nahibaw-an nga si Alfie kuyog sa usa ka seksing babaye nga mi-check in sa beach resort alas 11 pasado sa miaging Lunes sa gabii.

Dugang pa niya nga milapas na ang oras nga gitagal sa mga roomboy sa nahisgotang beach resort nga maoy hinungdan nga ilang gituktok alang sa pagpapangutana kun mo-extend pa ba kini og pipila ka oras.

Gituktok sa roomboy sa makadaghang higayon apan walay mitubag sa sulod sa cottage nga nagpasabot nga walay tawo sa sulod nga maoy nakaaghat sa pag-abli na lamang niini.

Sa pag-abli sa pultahan, nakita sa mga roomboy si Alfie nga hubo ang lawas nga nagkulob sa kama ug wala na magginhawa ug wala na usab sa maong lawak ang babaye nga kauban niini nga gituohang hilom nga misibat.

Si SPO4 Salingua miingon nga walay nahanaw sa mga butang sa namatay ug ang awto nga giluwanan sa pagsulod sa miaging gabii kuyog sa babaye gitugyan ngadto sa igsuon niining lalaki.

Hinuon si SPO4 Salingua miingon nga ilang girekomendar nga ipaubos sa autopsy ang patay’ng lawas ni Alfie alang sa pagtino sa hinungdan sa kamatayon niini. (BANAT NEWS)