Kapolisan gipasidunggan

CEBU, Philippines - Gipasidunggan sa kapolisan ang mga pulis nga nakahatag og maayong serbisyo lakip na ang mga station ug special unit commander nga maayo og performance ning tuiga.

Atol sa pagpanghatag og pasidungog sa Mandaue City Police Office (MCPO) kagahapon sa buntag didto sa Mandaue Sports and Cultural Complex ,si Mandaue City Mayor Jonas Cortes maoy unang nakadawat og Plaque of Appreciation gikan sa MCPO gumikan sa iyang walay hunong nga suporta sa kapolisan sa maong dakbayan.

Gisundan kini sa paghatag og pasidungog sa Best Police Station sa MCPO nga nadawat sa Station 5 kansang Best Police Station Commander mao si P/SInsp. Alfredo Ortiz Jr. sa Station 5. 

Samtang ang Best Deputy Police Station Commander mao usab si P/Insp. Wilfredo Abot sa maong police station,

Ang Best Police Unit mao ang City Anti Illegal Drug Special Operation Task Group o CAIDSOTG sa MCPO ug gidawat kini ni SPO4 Jose Dilao.

Ang Best City Police nakuha nila ni P/SInsp. Franco Rudolf Oriol Jr. ug P/SInsp. Ramil Morpos sa MCPO-IDMB.

 Lakip sa gipasidunggan mao sila si SPO4 Leandro Cosido, SPO4 Marco Retuya, SPO4 Sergio Tomaquin, SPO4 Apolinario Niez, SPO3 Arturo Manaling Jr.,SPO3 Marissa Ybiernas Basiga, SPO1 Arnulfo Quiachon Jr. ug Juliet Velasquez. Gipasidunggan usab ang mga kapitan sa barangay nga adunay dakong gikatabang sa operasyon sa kapolisan diin nadawat nila ni Subangdako Brgy. Kapitan Walter Dy, Mantuyong Brgy. Kapitan Antonio Maquilan ug Centro Brgy. Kapitan Piorello Latonio.

 Gumikan sa kooperasyon sa mga barangay tanod sa mga sakop sa MCPO sa pagsikop sa mga drug pusher ug illegal nga kalihukan sa illegal nga drugas hinungdan nga nadawat sa mga barangay tanod sa barangay Maguikay ang pasidungog ug ang nagdawat niini mao sila si Lauriano Gutana, Nelson Ganzon ug Andress Arcipe Jr.

Si Mayor Cortes mipadayag sa iyang pagdayeg sa mga nahimo sa MCPO ilabi na sa pagsulbad sa mga dagkong krimen nga nahitabo sa dakbayan sa Mandaue busa misaad siya nga dugangan niya ang sakyanan, armas ug uban pang kinahanglan sa MCPO.   - BANAT NEWS