Sanchez mikwestiyon sa pasidungog ni Magpale

CEBU, Philippines - Gikwestiyon ni Bise Gob. Gregorio Sanchez ang napasar sa mga sakop sa Hunta Probinsiyal nga paghatag og pasidungog ngadto sa ilang kaubang si provincial board member Agnes Magpale tungod sa paningkamot sa naulahi nga mapasirad-an ang mga massage parlors ug spa nga nagtanyag og lingam massage.

Sumala pa ni Sanchez nganong nakapasar ang maong resolusyon nga wala gani mahisguti sa mga sakop sa Hunta Probinsiyal ug matud pa niini nga di angayang pasidunggan sa board members ang ilang kauban kay sama ra kini nga nagdayeg sa kaugalingong anak o miyembro sa pamilya.

Iyang gitataw nga mas maayo kun ang laing tawo o ba kaha independenteng grupo maoy mopasidungog.

Si Magpale sa iyang bahin, miingon nga nauwaw siya sa gihimo sa bise gobernador tungod kay wala siya makahibalo nga hatagan siya og pasidungog sa mga kauban.

Si provincial board member Theddy Ouano miangkong siya ang nag-sponsor sa maong resolusyon tungod kay ang pagdayeg niya kang Magpale dili isip sa pagka-provincial board member kondili isip usa ka Cebuana nga nagpakabana ug nagprotektar sa katungod sa kababayen-an.

Samtang si bokal Joven Mondigo Jr. miingon nga miagi sa regular nga calendar ang maong resolusyon ug nauyonan sa tanan tungod kay walay bisan usa sa miyembro ang misupak.

Si ABC president sa probinsiya, nga si provincial board member Ribomapil Holganza Jr. nagkanayon nga morekomendar siyang mabutang sa hall of fame si Gobernador Garcia tungod sa kadaghang maayong nahimo niini sa probinsiya.

Giklaro hinuon ni Sanchez sa session kagahapon nga iyang babagan ang susamang maong resolusyon kay alang kaniya dili angayan nga mahatagan ang Gobernadora sa maong pasidungog tungod kay daghan kini og giatubang nga mga anomaliya.   - BANAT NEWS