Gwen wa manginlabot ni Byron

CEBU, Philippines - Nagdumili si Gobernador Gwendolyn Garcia sa lalawigan paghatag og komentaryo sa gikareport nga pag-interbiner sa iyang igsoon nga si kanhi Capitol Consultant on Security Matters Byron Garcia bahin sa motorsiklo niining gisikop sa City Traffic Operation Management kon CITOM.

Kini may labot sa pagkawalay lisensya sa iyang bata-bata nga nagmaneho sa maong sakyanan.

Matud pa ni Garcia nga nagpadayon pa siya sa paghupot sa iyang official function isip gobernador sa lalawigan sa Sugbo busa dili siya mokumentaryo og mga personal nga mga butang.

Kini tungod kay si Byron wala na magtrabaho sa Kapitolyo kay wala na i-renew ang kontrata niini busa matud pa sa gobernador   nga dili na usab angayan pa nga iyang hisgutan ang iyang igsoon.

Nagdumili usab sa pagkomentaryo ang gobernador sa gipahayag ni Byron nga ang mga kapolisan sa siyudad sa Sugbo nagpadayon sa pagokud kaniya ug sa iyang mga tawo bisan og wala na siya sa Kapitolyo tungod sa politika.

Sa iyang bahin, si Cebu City Police Office Director Sr. Supt. Patrocinio Comendador nagkanayon nga walay opisyales sa kagamhanan sa siyudad sa Sugbo ang nagmando sa kapolisan sa iyang pagabuhaton kay igo lamang sila nga nagtuman sa ilang katungdanan.

Dugang pa ni Comendador nga ang kapolisan sa siyudad walay labot sa politikanhong panagbingkil tali sa siyudad ug sa Kapitolyo. - BANAT NEWS