K9 dog sa capitol nakapaak

CEBU, Philippines - Usa ka 4-anyos nga batang babaye napaakan sa usa ka K9 dog sa Kapitolyo nga gigamit isip bomb sniffing dog atol sa ikaduhang adlaw sa kasaulogan sa ika-441 nga anibersaryo sa katukuran sa Kapitolyo kagahapon pasado alas-10 ang takna sa buntag.

Ang biktima naila sa pangalan nga si Ira Marie Lavitad, anak sa usa ka fruit vendor sa gawas nga bahin sa Kapitolyo.

Matud pa sa usa ka K9 dog trainer nga nagdumili sa pagtug-an sa iyang ngalan nga ang biktima nagdagan sa pagpalit og ice candy sa usa sa mga booth sa nagpadayong agri-fair sa Kapitolyo uban ang laing mga kabataan.

Sa dihang miagi kini sa nahimutangan sa maong iro kalit kining gihambat sa walang kilid. Gumikan sa gidak-on sa iro natumba ang bata apan maayo nalang nga napugngan sa trainer niini ang iro una pa mawisi-wisi ang bata.

Sumala pa nga nadali niini pag-ukang ang baba sa iro diha sa kilid sa bata ug sa paghimo gani niini hasta ang kamot sa trainer giapil og hambat.   

Ang bata apil na ang K9 dog trainer gidali sa pagdala sa Provincial Health Clinic nga nahimutang ra usab sa Capitol building aron mahatag kini og anti-rabies injection.

Si Gob. Gwendolyn Garcia mimando dayon og imbestigasyon sa maong insidente pinaagi sa Security Consultant sa Kapitolyo nga si retired Col. Ceasar Veloso.

Sumala pa ni Garcia nga ang iyang buhatan mohatag og financial assistance sa labing unang biktima sa pagpamaak og K9 dog diha sa sulod sa Capitol compound ug naatol pa gyud sa kasaulogan sa founding anniversary sa Kapitolyo.

Midugang usab ang gobernadora nga ang matabang sa iyang buhatan mag-agad lamang unya sa rekomendasyon sa Provincial Social Welfare Officer nga maoy mosusi sa kahimtang sa biktimang bata.  - BANAT NEWS