Ex-mayor gi-ambush

CEBU, Philippines - Ang kalinaw nga mipuli sa gubot untang sitwasyon sa lungsod sa Compostela human sa Mayo 10 nga eleksiyon napulihan og dili maayong hitabo sa dihang gibanhigan-patay sa sitio Lutaw, barangay Estaca sa maong lungsod ang kanhi mayor ning maong lugar niadtong Lunes sa alas 10:25 sa gabii.

Ang namatay mao si kanhi Mayor Joselito Reynes, taga barangay Cogon, nakaserbisyo usab nga konsehal sa lungsod ug nagsilbeng campaign manager ni mayor-elect Joel Quiño sa Bakud Party niadtong miaging eleksiyon. Si Reynes nahimong mayor sa Compostela niadtong dekada 80.

Si Reynes maoy nagsilbing campaign manager sa kampo ni Quiño sa Bakud Party sa nakalabay’ng eleksiyon.

Ang kapolisan padayon pang nangita og mga testigos nga makatumbok og posibleng nakaila sa mga gikatahapang duha ka mga lalaki nga nagsakay og motorsiklo nga wala makuhai sa plate number.

Matud ni SPO2 Pedro Enriquez sa Compostela Police Station sa dihang nahinabi sa Banat News sakay ang biktima sa iyang awto nga Hyundai nga may plaka nga YCT-105 paingon sa siyudad sa Sugbo.

Apan pag-abot sa maong lugar kalit kining gipadul-an sa nag-motor nga duha ka lalaki ug sa dihang nakasikit kalit gipusil sa backrider makatulo ka higayon ang biktima.

Natusak sa bala ang windshield sa atubangang bahin ug naigo tulo ka higayon ang biktima sa kilid nga bahin sa iyang lawas. Human niini daling miikyas ang mga mamumuno.

Ang kapolisan nakapunit og tulo ka kabhang sa bala sa .9mm pistol sa crime scene. Ang biktima gisuwayan pa unta og hatod sa Danao City District Hospital apan gideklarar kining dead on arrival (DOA).

Dihang nakahinabi sa Banat News si Quiño, mikompirmar kini nga iyang campaign manager ang biktima ug midugang nga silang ubana nianang pagka-gabii sa wala pa ang hitabo atol sa ilang pagtambong og bilar sa barangay Poblacion.

Matud ni Quiño nga nagkasabot silang mamauli og sayo tungod kay duna pa silay meeting pagka-ugma hinungdan nga nagbuwag-buwag sila tungod kay paingon siya sa norte samtang ang biktima paingon sa siyudad sa Sugbo.

Dako ang pagtuo ni Quiño nga dunay kalambigitan sa politika ang maong hitabo gumikan kay walay kontra ang biktima nga personal gawas lang sa pagkampanya niini kaniya niadtong milabay’ng eleksiyon.

Si Quiño midugang nga ang nahitabo epekto kini sa kainit sa politika sa ilang lungsod. Si Quiño ug walo ka mga konsehal ug bise mayor niini giprotestahan sa napilding mayor nga si Ritchie Wagas ug padayon pang gipaabot ang husay sa maong kaso.

Samtang si DILG-7 director ug officer-in charge sa Compostela nga si Pedro Noval Jr. misalikway dayon sa anggulong politika ang motibo sa krimen sanglit napupos naman ang ikatulo ug katapusang termino ni Reynes niadtong milabay’ng eleksyon ug wala na kini magpapili pa og laing posisyon.

Si Gob. Gwendolyn Garcia mimando kang Cebu Provincial Police Office director Sr. Supt. Erson Digal nga ipadali ang pag-imbestigar sa maong krimen.

Duha ka anggulo ang gisubay sa kapolisan sa maong ambush nga naglakip sa politika ug ang personal nga kaaway.

Si Dr. Nestor Sator, hepe sa PNP Crime Laboratory miingon nga naigo sa walang bukton ug duha sa dughan si Reynes, dunay usa ka bala sa .9 mm nga miungot sa iyang dughan.Matud ni Sator nga layo ang pagpusil sa mamumuno ngadto sa biktima.

Si PRO-7 Chief Supt. Lani-O Nerez mimando na kang Digal sa paghatag og duha ka temporary police escorts kang Quiño tungod sa nakitang kainit sa politika sa maong lungsod. - Darrel Carumba, Rey Pasaporte, Chester Abadilla, Romeo Limpangog ug Bong Soriano (BANAT NEWS)