Gitabanga'g luba patay

CEBU, Philippines - Nagtaop pa ang kutsilyo sa bukobuko sa gipatay nga batan-on dihang kini naabtang nagkulob sa tunga sa dalan human kini gitabangan og dunggab sa grupo sa mga batan-on sa Ouano Avenue barangay Subangdako dakbayan sa Mandaue sa milabay’ng gabii.

Ang biktima mao si Mark Andales, 20, residente sa sitio Mahayag sa samang barangay samtang gipangita pa sa kapolisan ang lima ngadto sa unom ka mga batan-ong gituohang miyembro sa gang nga giingong maoy mipatay sa biktima.

Sa imbestigasyon ni SPO1 Manuel Enolpe sa kapolisan sa Station 2 naglakaw padulong pauli ang biktima sa maong dapit dihang kalit gihunongan sa usa ka multicab sa iyang atubangan.

Pipila sa mga saksi mitug-an kalit nanganaog ang mga batan-on ug gitabangan og dunggab si Andales.

Ang biktima nahiagom og ubay-ubay nga samad dinunggaban sa kalawasan gikan sa mga kutsilyo ug patay na kining miabot sa tambalanan.

Sa pagresponde sa kapolisan nakuha sa dapit nahitaboan ang usa ka kutsilyo nga adunay lama sa dugo. – BANAT NEWS