Gitigbas kilay pahak

CEBU, Philippines - Napahak ang kilay sa usa ka tawo dihang natapsingan kini sa sundang sa iyang kainom didto sa sitio Buot, barangay Punta Ingaño, dakbayan sa Lapulapu sa miaging gabii.

Si SPO2 Ernesto Francisco sa homicide section sa kapolisan sa maong dakbayan miila sa biktima nga si Ronie Daquel, 29, ulitawo nga taga Punta Ingaño.

Samtang ang suspetsado nailhan usab nga si Randy Pidad, hingkod nga taga barangay Buanoy, lungsod sa Balamban.

Matud pa ni SPO2 Francisco nga nag-inom ang biktima ug ang suspetsado sa balay ni Renato Pidad sa maong dapit dihang mitumaw ang ilang panaglalis.

Unya ang suspetsado nga nahubsan na sa katarungan nakakuha og sundang sa balay nga ilang giinoman ug dihadiha gihabas dayon ang biktima.  

Maayo na lang kay abtik kaayong nakalihay ang biktima busa imbis bagolbagol niya maoy puntariya, kilay ra niya maoy nalaksi.

Dihang nakita sa suspetsado nga misidlit na ang dugo sa ibabaw’ng bahin sa mata sa biktima, mikaratel kini og dagan pahilayo sa maong lugar. Gihatod dayon ang biktima ngadto sa Opon District Hospital aron sa pagsalbar sa iyang kinabuhi samtang gipangita pa sa kapolisan ang suspek. (BANATNEWS)