Rama mas pabor sa helicopter

CEBU, Philippines - Dili gyud pabor si Mayor Michael Rama sa   sugyot ni Bise Mayor Joy Augustus Young nga mopalit ang siyudad og eroplano nga gipanag-iya sa Department of Education.

Matud pa ni Rama nga kung siya ang pasultihon dili siya uyon sa maong laraw gumikan kay daghan na siya og nadunggang mga tambag gikan sa mga kaila nga dili kini angayang paliton.

Si Young naglaraw nga paliton sa dakbayan ang Helio Aircraft Model H-391B (RP 39), Helio Aircraft Model H-295(RP 43), ug Helio Aircraft Model H-250/ 295 (RP 526) nga iya sa DepEd.

Buot ni Young nga gamiton ang maong mga abyon alang sa coastal management ug search and rescue operations.

Misugyot hinuon si Rama nga kun mopalit man ugaling og abyon ang dakbayan mas maayo pang helicopter na lang imbes nga eroplano.

Ang helicopter wala magkinahanglan og runway o airstrip aron makatugpa ug makalupad kumparar sa eroplano, mahimo usab kining makatugpa sa mga rooftop sa mga buildings ug gagmay’ng hawanan aron makaresponde sa mga emerhensiya.

Giklaro hinuon sa mayor nga dili pa niya kini karon prayoridad sanglit mas unahon niya ang mga basic services sa dakbayan.

Sumala pa niini nga kun makapalit man ang dakbayan og helicopter sa umaabot nga panahon buot niya kining itugyan sa Central Command aron maoy modumala sa maintenance sa unit ug lakip na usab ang pag-adto sa mga lugar nga may mga emerhensya.

Nasayran nga ang mga eroplano nga ibaligya sa DepEd kay mga karaan ug palitanan pa og mga piyesa aron makalupad.

Ang minimum nga pag-subasta sa nahisgutang tulo ka mga eroplano nagkantidad og US$100,000 o dul-an sa P4.6 million sa kasamtangang exchange rate.

Dugang pa niini mao nga 40-anyos na ang maong mga eroplano butang nga gikabalak-an sa mayor.  (BANATNEWS)