22-anyos gipatay samtang naglalis sa amigo

CEBU, Philippines - Patay diha-diha ang 22-anyos nga batan-ong lalaki human pusila sa duha ka nagmotorsiklong mga lalaki daplin sa karsada samtang kini nakiglalis sa iyang barkada diha sa sitio Lacdon barangay Cambuhawe lungsod sa Balamban niadtong Domingo sa alas 5:50 sa hapon.

Ang biktima mao si Jeefrey Vasquez, 22, walay permanenteng pinuy-anan samtang padayon pang giila sa kapolisan ang duha ka mga lalaking mamumuno.

Matud ni PO3 Rolando Navarro sa Balamban Police dihang nahinabi sa Banat News, ang biktima ug barkada niini nga si Noel Ulapong, 30, ang nagkalalis diha daplin sa dalan.

Tunga-tunga sa ilang panagbangi kalit nga miabot ang mga gikatahapan ug mihunong sa ilang tungod ug ang angkas kalit nga mipusil sa biktima makadaghang higayon.

Ang biktima naigo sa tiyan ug uban pang parte sa lawas ug nahagba samtang ang kauban niini naratol ug midagan pahilayo.

Sa pag-responde sa mga polis patay na ug naglunang sa iyang dugo ang biktima ug wala na diha ang mga gikatahapan. Narekober sa patay’ng lawas sa biktima ang mga pinaugang dahon sa Marijuana nga giputos og newspaper ingon man panyo nga kolor pula. Ang kapulisan padayon pa sa ilang manhunt operation pagsikop sa mga gikatahapan samtang ilaha pang gitino ang motibo sa hitabo.

Gidudahan nga tigpayuhot og Marijuana ang biktima gumikan sa nakuhang mga pinaugang dahun.  (BANATNEWS)