Trabahante giurom namatay

CEBU, Philippines – Patay na nga napalgan niadtong Biyernes sa buntag sa iyang kauban ang usa ka construction worker kinsa giingong giurom sulod sa ilang bunk house sa barangay Pooc, dakbayan sa Talisay.

Ang namatay mao si Dominador Bacayawa, hingkod, lumad nga taga Baliwag, Bulacan ug construction worker sa LBC Workers.

Si Danilo Ador, foreman sa nahisgutang kompaniya maoy mitawag sa buhatan sa kapolisan sa dakbayan busa girespondihan dayon nila ni PO3 Arnold Damasco, PO2 Leandro Azarcon, PO1 Rico Reboquio ug PO1 Rosauro Pansumala.

Si Damasco nga nahinabi sa Banat News kagahapon nagkanayon nga niadtong Huwebes sa gabii si Bacayawa busog kaayo sa iyang panihapon unya naligo dayon natulog.

Apan dihang gipukaw kini sa iyang kauban nga si Roger Banga Rodriguez sa pagka-Biyernes sa buntag wala na kini maglihok ug mituskig na ang lawas nga wala nay kinabuhi ug gituohan nila kining giurom.

Hinuon ipa-autopsy pa kini sa kapolisan aron masuta kun wala ba kini patya og tuyo.(BANATNEWS)