CEBU, Philippines – Posibleng mabalik sa ilang trabaho ang mga non-organic personnel nga gibansagang hawsyaw sa Bureau of Customs nga gipatangtang sa bag-ong milingkod nga BOC Commissioner sa milabay’ng semana.
Si BOC Commissioner Angelito Alvarez nga nahinabi sa mga sakop sa media mipadayag nga lakip sa plano ni Cebu Customs District Collector Atty. Ronnie Silvestre nga tukion sa mga district collectors ang non-organic personnel (NOP).
Miangkon si Alvarez nga naluoy siya sa mga naapektuhan sa maong kamanduan apan wala siyay mahimo gumikan kay mao usab kini ang mando sa bag-ong administrasyon apan andam siya nga maminaw sa mga opisyales sa BOC kalabot sa maong isyu.
Una niini si Silvestre mipadayag nga dako og ikatabang kanila ang mga NOP ilabi na sa panahong daghang transaksyon sa aduana matag adlaw.
Gidasunan kini ni Deputy Collector Francis Agustine Erpe. Sa pakighinabi sa Banat News kang Erpe kini mipadayag nga kulang gyud ang tawo sa BOC-Port of Cebu.
Matud pa ni Erpe daghan sa mga NOP ang mapahimuslan ug mga hanas na sa ilang tagsatagsa ka mga assignments tungod sa kadugay nang panahon nga sila kaabag sa mga division head sa maong ahensiya.
Wala hinuon maghisgot si Erpe kun unsaon ang paagi sa pagpasweldo sa mga hawsyaw nga kawani sanglit dili man sila matawag nga empleyado tungod kay ‘non-organic’ man sila.
Si Alvarez mipasalig nga bisan pa sa maong kamanduan iyang paningkamutan nga makakuha og dugang empleyadong casual o job orders aron sa pag-abag sa operasyon sa BOC. (BANATNEWS)