Malacañang sa Sugbu bakwion sa Customs

CEBU, Philippines - Gitinguha sa mga kadagkoan sa Bureau of Customs-Port of Cebu ang pagkuha og balik sa Malacañang sa Sugbu nga maoy kanhing edipisyo nga nahimutangan sa adwana.

Atol sa ika-124th nga Founding Anniversary sa BOC-POC kagahapon si kanhi Cebu Customs Collector Ricardo Belmonte mihangyo ngadto ni BOC Commissioner Angelito Alvarez nga hatagan og pagtagad sa iyang buhatan ang tinguha sa mga opisyal sa POC nga mabawi og balik ang maong edipisyo.

Matud pa ni Belmonte walay tinguha si Presidente Benigno “Noynoy” Aquino III nga gamiton ang MSS sa iyang administrasyon hinungdan nga mas maayong bawion kini og balik aron makaminos sa ilang galastuhan sa abang sa maong edipisyo.

Masaligon si Belmonte nga makatabang si Alvarez niini ilabi na sa paghangyo niini ngadto sa kongreso.

Nagsugod mag-opisina ang BOC-POC sa Cebu International Port panahon pa ni kanhi Cebu Customs Collector Ma. Lourdes Mangaoang apan nagbayad sila og P50 mil nga abang matag bulan ngadto sa CIP.

Samtang si kanhi Cebu Customs Collector ug karon Zamboanga del Norte Gov. Rolando Yebes mitug-an sa mga sakop sa media nga sa iyang panahon ilang nadiskubrehan nga base sa kasaysayan sakop pa sa BOC-POC ang Plaza Independencia ug dili sa dakbayan sa Sugbu human kini wala makapakita og papeles ngadto kanila.

Kaniadto nagplano si Yebes nga ila kining bawion apan miabot ang panahon nga siya gihulipan na sa iyang katungdanan ug nadestino sa kaulohan.

Gumikan niini miani sila og suporta ni Alvarez kinsa misaad nga buot nilang tukion uban sa bag-ong napiling Secretary sa Department of Finance ang maong isyu.

Matud pa ni Alvarez nagpasalamat usab siya sa ilang panagkita ni Cebu City Mayor Michael Rama atol sa iyang pagbisita dinhi sa Sugbu ug buot niining hisgutan ang pagpangayo og tabang nga mabalik sa BOC ang Malacañang sa Sugbu.

Atol usab sa usa ka press conference sa mga sakop sa media kagahapon sa udto si Alvarez mipadayag sa ilang seryosong kampanya sa pagpuhag sa mga smugglers sa nasud.

Matud pa ni Alvarez adunay usa ka smuggler (dili pa ibutyag kung kinsa) ang ilang pasakaan og kaso karong umaabot Huwebes sa sunod semana.

Si Presidente Benigno “Noynoy” Aquino III mimando nga sa matag tulo ka semana sa bulan kinahanglang adunay mataral sa hukmanan nga smugglers uban usab sa ilang kongkretong ebidensiya.

Giisip ni Alvarez nga seryoso ug lig-ong mensahe ang buot ipaabot ni Aquino ngadto sa mga buot mopalusot o smugglers sa nasud lakip na dinhi sa Sugbu ug miingon nga nahuman na ang ilang mga malipayong adlaw sa illegal nga kalihukan.  – BANAT NEWS