BOC-Cebu magsaulog sa ika-24 kasumaran

CEBU, Philippines - Saulogon karong adlawa ang ika-124 nga anibersaryo sa buhatan sa Bureau of Customs Port of Cebu. Mga nangaging district collector sa adwana pasidunggan atol sa kalihukan.

Kini maoy unang higayon nga saulogon sa adwana ang anibersaryo sa pagkatukod sa Port of Cebu panahon pa sa mga Katsila.

Base sa kasaysayan, ang buhatan sa Customs unang nagsugod dinhi sa Sugbo sa panahon sa mga Katsila diin dinhi gihimo ang “barter trade” tali sa mga lumad nga Sugboanon ug mga negosyanteng Insik.

Matud pa ni Cebu Customs District Collector Ronnie Silvestre nga ang maong kasaulogan personal nga tambongan ni Customs Commissioner Angelito Alvarez isip pinasidunggang dinapit.

Lakip sa maong kalihukan mao ang paghatag og pasidungog sa mga kanhi district collector nga nakaserbisyo sa adwana sa Sugbo. Kini sama nilang Collector Oscar Brillo, David “Boy” Odilao Jr., Rolando Yebes, Felipe Bartolome, John Tan, Roberto Sacramento, Ma. Lourdes Mangaoang ug Ricardo Belmonte.

Matud pa ni Silvestre nga kinahanglang saulogon ang paghandom sa katukoran sa adwana ug hatagan og pasidungog ang mga kanhi district collector nga nagserbisyo sa Port of Cebu aron pag-ila sa ilang nahimo ug natampo pagdumala sa Port of Cebu.

Gumikan niini, nakadawat og pagdayeg si Silvestre sa mga kawani sa adwana sa Sugbo tungod sa iyang gihimong pag-ila sa mga opisyal nga nakahatag og maayong serbisyo BOC-Cebu diin pipila ka mga nangaging district collector misanong sa imbitasyon sa maong okasyon.

Si Belmonte naila nga district collector nga adunay maayong collection performance, apan gitangtang ni kanhi presidente Gloria Macapagal-Arroyo niadtong Disyembre tungod sa pagbali sa iyang pamilya ngadto sa Liberal party.

Samtang si Mangaoang giisip usab nga malampuson nga kanhi district collector sa adwana sa Sugbo tungod sa paghupot niya karon sa X-ray Inspection Project (XIP) sa tibuok adwana sa nasud.

Sukad Mayo 2007 hangtod Marso 2010, ang XIP nga gidumala ni Mangaoang nakasakmit og nagkadaiyang kontrabando nga nagkantidad og P2.1 bilyones, lakip na niini ang mga kemikal nga gamiton pagbuhat og shabu.

Sukad Enero sa 2008 hangtod sa Mayo 2010, dugang P39.7 bilyones nga buhis sa mga imported nga kargamento ang nakolekta tungod sa X-ray inspection. – BANAT NEWS