2 patay sa roadtest

CEBU, Philippines - Duha ang patay ug duha usab ang grabeng naangol human ang Mitsubishi Pajero nga gi-roadtest human gipaayo sa talyer nabangga sa punoan sa kahoy taliwala sa island samtang nagdulhog sa Marcelo Fernan Bridge sa dalan United Nations Avenue sa Umapad, Mandaue alas 2 pasado ang takna kagahapon sa hapon.

Si PO2 Dante Flores sa Traffic Division sa Mandaue City Police Office (MCPO) miila sa namatay nga mao si Emmie Babao nga usa ka driver-mechanic nga taga dakbayan sa Lapulapu ug laing namatay ang usa ka Rolly nga helper ni Babao.

Ang laing helper sa mekaniko nga naangol tungod kay miligid sa karsada nailhan nga si Micheal Ibar.

Naangol usab ang tag-iya sa Pajero nga si Agapito Amores, residente sa barangay Marigondon, kinsa sakay sa maong sakyanan atol sa roadtest.

Sumala sa kapolisan nga nag-inom pa si Babao nianang pagka-udto sa wala pa niini gipaandar ang sakyanan ni Amores ug gipadagan sa pag-road test kuyog ni Amores ug duha ka helper.

Si Amores nga nahinabi ni PO2 Flores miingon nga nagpaayo lamang siya sa iyang Pajero ngadto ni Babao.

Aron pagsuta sa kondisyon sa sakyanan gi-road test kini gikan sa dakbayan sa Lapulapu paingon sa dakbayan sa Mandaue.

Matud pa ni Amores nga kusog kaayo nga nagdagan ang sakyanan sa dihang nawagtangan kini og preno samtang nagdulhog sa ikaduhang taytayan hinungdan nga nabangga sa punoan sa Talisay nga nagbarog sa island sa UN Avenue.

Si Rolly milayat sa sakyanan sa dihang mipaingon sa lawom nga dapit sa kilid sa karsada ang Pajero. Apan nabunal kini hinungdan sa hinanaling kamatayon.

Si Amores nakaangkon lamang og mga pangos ug bun-og sa lawas, samtang si Ibar gitabang sa mga sakop sa Emergency Rescue Unit Foundation ug gidala sa Mandaue City District Hospital.

Si Rolly patay dihadiha samtang si Babao gideklarar nga dead on arrival sa naasoy’ng ospital. – BANAT NEWS